काठमाडौं। श्रीलङ्काको कोलम्बोमा जारी सेन्ट्रल एसियन भलिबल संघ (काभा) यु-१९ महिला च्याम्पियनसिपमा नेपालले लगातार दोस्रो जित दर्ता गराएको छ।

कोलोम्बोमा आज भएको लिग चरणको आफ्नो तेस्रो तथा अन्तिम खेलमा नेपालले माल्दिभ्सलाई ३-० को सोझो सेटमा पराजित गरेको हो। नेपालले माल्दिभ्सलाई पहिलो सेट २५-७ ले पराजित गर्‍याे भने दोस्रो सेट २५-१० तथा तेसो सेट २५-११ ले हरायो।

आजको जितपछि नेपालले तीन खेलबाट सात अंक जोडेको छ। यसअघि कीर्गिस्तानसँग ३-२ को सेटमा पराजित भएको नेपालले घरेलु टोली श्रीलंकालाई ३-१ को सेटमा हराएको थियो।

चार टिम सहभागी यस प्रतियोगितामा सिङ्गल राउण्ड रोविनका आधारमा खेल हुनेछ। त्यसपछि लिग चरणको अंक तालिकाको आधारमा सेमिफाइनल खेल हुनेछ।