काठमाडौं । चाइना इनर्जी इन्जिनियरिङ समूहले विश्वकै सबैभन्दा ठूलो एकीकृत हरित हाइड्रोजन–एमोनिया–मेथानल उत्पादन केन्द्र निर्माणलाई तीव्रता दिएको छ । चीनको उत्तर–पूर्वी प्रान्त जिलिनस्थित सोङयुआन हाइड्रोजन ऊर्जा औद्योगिक पार्कले यसै वर्षको अन्त्यसम्म हरित एमोनिया उत्पादन सुरु गर्ने तयारी गरिरहेको छ । हरित हाइड्रोजनबाट उत्पादन हुने एमोनिया नयाँ ऊर्जा सवारीसाधन र पावर जेनेरेटरका लागि स्वच्छ इन्धनको विकल्प मानिन्छ ।

उक्त परियोजनामा ५० मेगावाट सौर्य ऊर्जा प्रणाली र ५९० मेगावाट वायु ऊर्जा फार्ममार्फत प्राप्त विद्युत् प्रयोग गरी पानीलाई हाइड्रोजन र अक्सिजनमा छुट्याउने अत्याधुनिक इलेक्ट्रोलाइजर सञ्चालन गरिनेछ ।

इलेक्ट्रोलाइजरको विश्वव्यापी उच्च मागका बीच चीनका छ कम्पनी विश्वका शीर्ष १० निर्माता सूचीमा परेका छन् । जसले चीनलाई उपकरण आपूर्तिमा बलियो बनाएर परियोजना सहज बनाएको छ । विशेषज्ञहरूका अनुसार हरित एमोनिया उत्पादन प्रविधि परिपक्व हुँदै जाँदा सन् २०३५ सम्म यसको वार्षिक माग १० करोड टन नाघ्न सक्नेछ ।

चीन बिजुली परिषद्का कार्यकारी उपाध्यक्ष याङ कुँका अनुसार चीनले १.७ अर्ब किलोवाटभन्दा बढी वायु तथा सौर्य ऊर्जा जडान क्षमता हासिल गरिसकेको छ । जसले ‘हरित पेट्रोलियम’ जस्ता नयाँ हरित ऊर्जा उत्पादनहरूको लागत घटाउँदै कम–कार्बन विकासलाई तीव्रता दिनेछ ।

परियोजना पूर्ण भएपछि यस मेगापार्कले ३ गिगावाट नयाँ ऊर्जा उत्पादन क्षमता प्राप्त गर्नेछ र हरेक वर्ष ८ लाख टन हरित एमोनिया तथा मेथानल उत्पादन गर्ने लक्ष्य राखिएको छ । सीसीटीभी