काठमाडौं । अष्ट्रेलियामा एक स्काइडाइभरको आपतकालीन (रिजर्भ) प्यारासुट गल्तीवश खुल्यो । यो विमानको पुच्छरको पखेटामा अड्कियो, जसले गर्दा प्याराडाइभर १५,००० फिटको उचाइमा हावामा झुन्डिए। यो घटना नर्थ फ्री-फल क्लबको लागि उडानको क्रममा भएको थियो।

त्यही समयमा अन्य १३ जना प्याराडाइभरहरू विमानबाट हाम फाले । फसेका प्याराजम्परले अड्किएको प्यारासुटका सबै ११ डोरीहरू काटेर आफूलाई मुक्त गरे। पखेटामा फसेका स्काइडाइभरले पछि आफ्नो मुख्य प्यारासूट खोले र अवतरण गरे। उनलाई सामान्य चोटपटक लाग्यो।

अष्ट्रेलियन ट्रान्सपोर्ट सेफ्टी (एटीएसबी) का अनुसार जब स्काइडाइभर फसे, विमानको गति अचानक कम भयो। यसले गर्दा पाइलटलाई विमानको इन्जिन रोकिएको विश्वास भयो। त्यसपछि पाइलटले मेडे कल गरे र उनी पनि हाम फाल्न तयार भए। यद्यपि, केही कठिनाइ पछि विमान जमिनमा अवतरण भयो।

यो घटना सेप्टेम्बर २० मा भएको थियो, तर भिडियो अहिले भाइरल भइरहेको छ। “मिडवेज एट द बीच” कार्यक्रमको क्रममा स्टन्टमा १६ जना स्काइडाइभरहरूले १५,००० फिटको उचाइबाट हाम फाल्नुपर्ने थियो, त्यसपछि आफ्नो प्यारासुट खोलेर एक अर्काको हात समातेर चेन बनाउनुपर्ने थियो ।

एक प्यारासुटिंग क्यामेरा अपरेटरले सम्पूर्ण घटनाको भिडियो खिचिरहेका थिए। तर पहिलो स्काइडाइभर विमानबाट बाहिर निस्कने बित्तिकै, सम्पूर्ण योजना केही सेकेन्डमै बिथोलियो । अष्ट्रेलियाली यातायात सुरक्षा ब्यूरोले जारी गरेको भिडियोमा पहिलो स्काइडाइभरको खुट्टा चिप्लिएको र उनको रिजर्भ प्यारासुट खुलेर विमानको पखेटामा अड्किएको देखिन्छ।

सबै स्काइडाइभरहरू विमानबाट बाहिर निस्केपछि र अलपत्र स्काइडाइभर सुरक्षित रूपमा हाम फालेपछि पाइलटले विमानलाई नियन्त्रणमा लिए। पाइलटले ब्रिस्बेन केन्द्रमा आपतकालीन सन्देश पठाएर विमानलाई सुरक्षित रूपमा विमानस्थलमा अवतरण गर्न सफल भए।

घटना प्रकाशमा आएदेखि नर्थ फ्रि-फल क्लबले आफ्नो सुरक्षा प्रोटोकलमा धेरै परिवर्तनहरू गरेको छ, जसमा सबै स्काइडाइभरहरूलाई हुक चक्कु लगाउन अनिवार्य गरिएको छ। साथै, अष्ट्रेलियाली सरकारले यस घटनाका कारण मानिसहरूलाई प्यारासुट ह्यान्डलको बारेमा सचेत रहन र विमानबाट बाहिर निस्कँदा अतिरिक्त सावधानी अपनाउन पनि सल्लाह दिएको छ।