काठमाडौं । दक्षिण अफ्रिकाको जोहानेसबर्गमा आइतबार अज्ञात बन्दुकधारीहरूले अन्धाधुन्ध गोली चलाउँदा १० जनाको मृत्यु भएको छ भने १० जना घाइते भएका छन्।

प्रहरीका अनुसार आक्रमणको उद्देश्य तत्काल स्पष्ट भएको छैन। गौतेङ प्रान्तीय प्रहरी प्रवक्ता ब्रिगेडियर ब्रेन्डा मुरिडिलीले केही पीडितहरूलाई सडकमा जथाभावी गोली हानेको बताए।

पहिचान हुन नसकेका पीडितहरूलाई बेकरस्डलको एक बार नजिकै गोली हानी हत्या गरिएको थियो।

घाइतेहरूलाई उपचारको लागि अस्पताल लगिएको छ। प्रहरीले घटनाको अनुसन्धान गरिरहेको छ र आक्रमणकारीहरूको खोजी गरिरहेको छ।

यो महिना दक्षिण अफ्रिकामा भएको दोस्रो ठूलो गोलीकाण्ड हो। डिसेम्बर ६ मा, राजधानी प्रिटोरिया नजिकैको एक होस्टेलमा भएको गोलीकाण्डमा तीन वर्षको बच्चा सहित १२ जनाको मृत्यु भएको थियो।

प्रहरीका अनुसार होस्टेलमा अवैध रूपमा रक्सी बिक्री भइरहेको थियो। ६ करोड ३० लाख जनसंख्या भएको दक्षिण अफ्रिकामा उच्च अपराध दर छ र यो विश्वमा सबैभन्दा बढी हत्या दर भएका देशहरू मध्ये एक हो।