काठमाडौं । दक्षिणी मेक्सिकोको ओक्साका राज्यमा एउटा रेल पटरीबाट उछिट्टिँदा इन्जिन पल्टिएको छ र धेरै डिब्बाहरू पल्टिएका छन्।

घटनामा तेह्र जनाको मृत्यु भएको छ भने ९८ जना घाइते भएका छन्। रेल मेक्सिकोको खाडी र प्रशान्त महासागरलाई जोड्ने नयाँ रेलमार्गमा यात्रा गरिरहेको थियो। यो रेलवे लाइन मेक्सिकन नौसेनाले सञ्चालन गर्छ।

मेक्सिकन नौसेनाका अनुसार रेलमा नौ जना चालक दलका सदस्यसहित २५० जना सवार थिए। दुर्घटना चिभेला र निजान्डा शहरहरू बीचको घुमाउरो मोडमा भएको थियो।

घाइतेमध्ये ३६ जनाको अस्पतालमा उपचार भइरहेको छ। राष्ट्रपति क्लाउडिया शेनबाउमले सामाजिक सञ्जाल प्लेटफर्म एक्समा घाइतेमध्ये पाँच जनाको अवस्था गम्भीर रहेको बताएकी छिन्। उनले मृतकका परिवारलाई सहयोग गर्न वरिष्ठ अधिकारीहरूलाई घटनास्थलमा जान आदेश दिएकी छिन्।