काठमाडौं । पश्चिमी अष्ट्रेलियाको पर्थ निवासी १३ वर्षीय अस्टिन एपल्बीले समुद्रमा फसेका आफ्नी आमा र दुई भाइबहिनीलाई चार घण्टा संघर्ष गरेर बचाएका छन्। गत जनवरी ३० मा अस्टिन (१३), आमा जोआन एपल्बी (४७), भाइ बो (१२) र बहिनी ग्रेस (८) क्विन्डालपको किनारमा कायक र प्याडलबोर्डमा खेलिरहेका बेला अचानक आएको बलियो हावा र छालले उनीहरूलाई समुद्रतर्फ टाढा बगाएको थियो।

अष्ट्रेलियाको एबीसी न्युजका अनुसार आमाले भनिन्, ‘हावा झन् बलियो हुँदै गयो, हामीले प्याडल हरायौं र अझै टाढा बग्दै गयौं।’ त्यसबेला उनले अस्टिनलाई किनारतर्फ पठाइन्।

अस्टिनले परिवारलाई बचाउन एक्लै कायक चलाएर किनारतर्फ लागे। तर कायक चाँडै भाँचियो र पानी भरिन थाल्यो। उनले हातले प्याडल गर्न खोजे तर सफल भएनन्। अन्ततः उनले कायक छोडेर पौडी खेल्न थाले।

जीवनरक्षक ज्याकेटले बाधा पुर्‍याएपछि उनले त्यो फुकालेर शरीरले मात्र पौडी खेले। करिब दुई घण्टापछि उनी किनारमा पुगे। उनले बीबीसीलाई भने, “पौडी खेल्दा प्रार्थना गरेँ, भजन गाएँ, सकारात्मक रहन प्रयास गरेँ। परिवार, साथीहरू र प्रेमिकाको सम्झना आयो।”

करीब चार घण्टापछि ४ किलोमिटर दूरी पार गरेर किनार पुगेपछि उनले आमाको फोन प्रयोग गरेर उद्धार टोलीलाई खबर गरे। थकानका कारण उनी ढले। स्थानीय मरीन रेस्क्यु टोलीले राति ८:३० बजे करिब १४ किलोमिटर टाढा समुद्रमा आमासहित दुई बच्चालाई प्याडलबोर्डमा अडिएको अवस्थामा भेट्यो।

मरीन रेस्क्यु अधिकारी पल ब्रेसल्यान्डले भने, “बालकले दिएको कायक र प्याडलबोर्डको विवरण खोजीमा अत्यन्त महत्वपूर्ण भयो। उनको पौडी साँच्चिकै अद्भुत थियो।” उनले थपे, “आमा पनि वीर हुन्। उनले बच्चाहरूलाई छोडिनन्, अन्तिम क्षणसम्म समातिरहिन्।”

आमाले भनिन्, “अस्टिनलाई पठाउन बाध्य भएँ, तर ऊ बाँच्नेछ भन्ने विश्वास थिएन। हामीलाई कसैले बचाउने अपेक्षा थिएन। त्यो एक दुःस्वप्न थियो।” उनले थपिन्, “गम्भीर चोटबिना सबैलाई बचाउन सक्नु नै परिपूर्ण अन्त्य हो।”
उद्धारपछि परिवारलाई सामान्य चोटका लागि अस्पतालमा उपचार गरियो। अस्टिन मांसपेशी दुखाइका कारण क्रच प्रयोग गरेर विद्यालय गए। उनले भने, “मलाई लाग्दैन कि म नायक हुँ। मैले गर्नुपर्ने काम मात्र गरेँ।”

स्थानीय प्रहरीले भने, “सौभाग्यवश सबैले जीवनरक्षक ज्याकेट लगाएका थिए, जसले उनीहरूलाई बचायो। अस्टिनको साहस र दृढता प्रशंसनीय छ। उनले आफ्नो परिवारलाई बचाए।”