काठमाडौं । साउदी अरबले देशका लाखौँ ऊँटलाई पासपोर्ट जारी गर्ने घोषणा गरेको छ। अधिकारीहरूको भनाइ अनुसार यस कदमले यी बहुमूल्य जनावरलाई अझ राम्रोसँग पालनपोषण गर्न मद्दत गर्नेछ।

साउदी अधिकारीहरूका अनुसार यस कदमले ऊँट पालनका फाइदा बढ्नेछन्। साथै जनावरहरूको पहिचान र उनीहरूको मालिकबारे विश्वसनीय डाटाबेस तयार हुनेछ।

पर्यावरण, जल तथा कृषि मन्त्रालयले सामाजिक सञ्जालमा सार्वजनिक गरेको भिडियोमा यससँग सम्बन्धित कागजातहरू देखाइएको छ। उक्त भिडियोमा हरियो पासपोर्ट देखिन्छ, जसमा देशको राजचिह्न र सुनौलो ऊँटको छाप छ।

सन् २०२४ मा सरकारले अनुमान गरेको थियो कि साउदी अरबमा करिब २२ लाख ऊँट छन्। यी ऊँटहरूले हरेक वर्ष देशको अर्थतन्त्रमा दुई अर्ब रियालभन्दा बढी योगदान दिने गरेका छन्।

‘अरब न्यूज’का अनुसार विश्वभर करिब ३.५ करोड ऊँट छन्, जसमा १.७ करोड अरब मुलुकहरूमा छन्। यस मामिलामा सोमालिया पहिलो स्थानमा छ, त्यसपछि सूडान, मौरिटानिया, साउदी अरब र यमन छन्।

ऊँट साउदी अरबको राष्ट्रिय प्रतीकको हिस्सा हो। देशमा ऊँटहरूको सौन्दर्य प्रतियोगिता र प्रदर्शनहरू पनि आयोजना गरिन्छ, जहाँ उत्कृष्ट ऊँटलाई पुरस्कार दिइन्छ।

राष्ट्रिय दिवस, विशेष तथा ऐतिहासिक अवसरमा साउदी अरबका प्रदर्शनीहरू ऊँटबिना अधूरा मानिन्छन्। साउदी अरब र खाडी मुलुकहरूमा ऊँटको भूमिकाको लामो इतिहास रहिआएको छ ।