काँक्रेविहार (सुर्खेत)। कर्णालीमा १५ हजारभन्दा बढी सुरक्षाकर्मीहरू चुनावमा परिचालन गरिएको छ।

कर्णाली प्रदेश प्रहरी कार्यालयका प्रवक्ता, प्रहरी वरिष्ठ उपरीक्षक राम प्रकाश शाहका अनुसार सो सङ्ख्यामा प्रहरी र निर्वाचन प्रहरीहरू निर्वाचनको सुरक्षामा खटिएको बताए।

पाँच हजार ५८० नेपाल प्रहरी र नौ हजार ७४२ निर्वाचन प्रहरीहरू रहेका छन्। कर्णालीका विमानस्थल र कारागारहरूको सुरक्षा नेपाली सेनाले लिएको छ। यी क्षेत्रलाई संवेदनशील रूपमा हेरिएकाले सेनाले सुरक्षा जिम्मा लिएको हो।

कर्णालीमा रहेका सुर्खेत, रुकुम पश्चिम, डोल्पा, मुगु, जुम्ला र हुम्ला जिल्लामा रहेका छ वटा विमानस्थल र नौ वटा कारागारको सुरक्षामा सेना खटिसकेको शाहले बताए।

कर्णालीमा १० लाख ३७ हजार २५० जना कुल मतदाता रहेका छन्। नौ सय ४१ मतदानस्थल र १४ सय ३७ मतदान केन्द्रहरू रहेका छन्।