काठमाडौं। एटलान्टिक महासागरमा सञ्चालित एक पर्यटकीय पानीजहाजमा मुसाबाट सर्ने दुर्लभ र घातक ‘हान्ताभाइरस’ देखिएपछि विश्व स्वास्थ्य संगठन (डब्लूएचओ) ले उच्च सतर्कता अपनाउँदै अनुसन्धान सुरु गरेको छ।

अर्जेन्टिनाको उशुआयाबाट केप भर्डेतर्फ यात्रा गरिरहेको ‘एमभी होन्डियस’ नामक क्रुज जहाजमा रहेका यात्रुहरूमध्ये हालसम्म तीन जनाको मृत्यु भइसकेको छ भने कम्तीमा एक जनामा यो भाइरसको संक्रमण पुष्टि भएको छ।

डब्लूएचओले आइतबार जारी गरेको वक्तव्यअनुसार कुल छ जना प्रभावितमध्ये एक जनाको अवस्था गम्भीर छ र उनको हाल दक्षिण अफ्रिकाको जोहानेसबर्गस्थित सघन उपचार कक्ष (आईसीयू) मा उपचार भइरहेको छ।

दक्षिण अफ्रिकाको स्वास्थ्य मन्त्रालयका अनुसार यो प्रकोपबाट मृत्यु हुनेमा एक वृद्ध दम्पती समेत रहेका छन्। सुरुमा लक्षण देखिएका ७० वर्षीय पुरुषको जहाजमै मृत्यु भएको थियो र उनको शव अहिले सेन्ट हेलेना टापुमा राखिएको छ।

उनकी ६९ वर्षीया श्रीमतीलाई उपचारका लागि दक्षिण अफ्रिका लगिए पनि अस्पतालमै उनको निधन भएको छ। जोहानेसबर्गमा उपचाररत ६९ वर्षीय अर्का बिरामीमा भने प्रयोगशाला परीक्षणबाट हान्ताभाइरस भएको आधिकारिक पुष्टि भइसकेको छ।

संक्रमित मुसाको दिसा वा पिसाबको सम्पर्कबाट मानिसमा सर्ने यो रोगले गम्भीर अवस्थामा रगत बग्ने ज्वरो (हेमोरेजिक फिभर) निम्त्याउने गर्दछ, जसका कारण बिरामीको ज्यान जाने जोखिम उच्च रहन्छ।

हाल डब्लूएचओले प्रभावित जहाजका अन्य यात्रु र चालक दलका सदस्यहरूको स्वास्थ्य अवस्थाबारे अनुसन्धान गरिरहेको छ भने भाइरसको प्रकृति बुझ्न ‘जिन सिक्वेन्सिङ’को काम पनि अगाडि बढाइएको छ।

लक्षण देखिएका अन्य दुई यात्रुको उद्धारका लागि विभिन्न देशहरूबीच समन्वय भइरहेको र थप प्रयोगशाला परीक्षणहरू जारी रहेको जनाइएको छ। स्वास्थ्य अधिकारीहरूले मृतकमध्ये एक जना बेलायती नागरिक भएको आशंका गरे पनि अन्यको राष्ट्रियता भने अझै खुल्न बाँकी रहेको बताएका छन्।

यो घटनाले अन्तर्राष्ट्रिय जलक्षेत्रमा सञ्चालित पर्यटकीय जहाजहरूमा हुन सक्ने स्वास्थ्य जोखिमप्रति विश्वको ध्यान पुनः केन्द्रित गरिदिएको छ।