किन्सासा (कंगाे। डेमोक्रेटिक रिपब्लिक अफ कंगाेमा इबोला भाइरसको संक्रमण भयानक रूपमा फैलिएपछि विश्व स्वास्थ्य संगठन (डब्ल्यूएचओ) ले अन्तर्राष्ट्रिय स्तरको सार्वजनिक स्वास्थ्य आपतकाल घोषणा गरेको छ।

कंगाेमा तीव्र गतिमा फैलिरहेको यस महामारीका कारण हालसम्म ८८ जनाको ज्यान गइसकेको छ भने स्थिति नियन्त्रण बाहिर जान थालेपछि डब्ल्यूएचओले विश्वव्यापी रूपमा उच्च सतर्कता अपनाउन आग्रह गर्दै आपतकालको घोषणा गरेको हो।

स्थानीय स्वास्थ्य अधिकारीहरूका अनुसार हालसम्म ८८ जनाको मृत्यु भइसकेको यस प्रकोपमा अन्य ३३६ जनाभन्दा बढी मानिसमा संक्रमणको गम्भीर आशंका गरिएको छ। कंगाेका स्वास्थ्य मन्त्रीले दिएको जानकारीअनुसार अहिले फैलिएको इबोलाको यस घातक प्रजातिका लागि हाल कुनै निश्चित खोप उपलब्ध छैन।

उपचार र रोकथामका उपायहरू पर्याप्त नहुँदा यस रोगको मृत्युदर करिब ५० प्रतिशतसम्म पुग्न सक्ने अनुमान गरिएकाले स्वास्थ्य क्षेत्रका विज्ञहरूले गम्भीर चिन्ता व्यक्त गरेका छन्।

यो महामारी कंगाेको उत्तर-पूर्वी क्षेत्रमा पर्ने इटुरी प्रान्तबाट सुरु भएको हो। यो क्षेत्र छिमेकी मुलुकहरू युगान्डा र दक्षिण सुडानको सीमानासँग जोडिएकाले भाइरस अन्तर्राष्ट्रिय सीमा पार गरेर अन्य देशमा समेत फैलिन सक्ने उच्च जोखिम रहेको छ।

अनुसन्धानका क्रममा यस पटकको प्रकोपको प्रारम्भिक बिरामी (इन्डेक्स केस) एक स्थानीय स्वास्थ्यकर्मी नै भएको खुलेको छ, जसका कारण अस्पताल र स्वास्थ्य संस्थाहरूबाटै संक्रमण अरूमा सरेको अनुमान गरिएको छ।

अहिले प्रभावित क्षेत्रका स्थानीय बासिन्दाहरूले उचित उपचार केन्द्र र आइसोलेसन वार्डहरूको चरम अभाव भोग्नुपरिरहेको गुनासो गरेका छन्। पूर्वाधार र साधनस्रोत नहुँदा कतिपय बिरामीहरूको घरमै दर्दनाक मृत्यु भइरहेको छ, जसले गर्दा समुदायस्तरमा यो रोग अझै भयावह रूपमा फैलने खतरा बढाएको छ।

कंगाेमा मानवीय संकट गहिरिँदै गएपछि विभिन्न अन्तर्राष्ट्रिय स्वास्थ्य सहायता संस्थाहरूले ठूलो मात्रामा आर्थिक सहयोग, आवश्यक औषधि र विशेषज्ञ उपचार टोलीहरू प्रभावित क्षेत्रमा पठाउने आपतकालीन तयारी तीव्र पारेका छन्।