लस एन्जलस। अमेरिकाको लस एन्जलस नजिकै पर्ने सिमी भ्याली क्षेत्रमा सोमबार लागेको भीषण ब्रस फायर (घाँसे तथा झाडीजन्य क्षेत्रको आगलागी) तीव्र हावाका कारण नियन्त्रण बाहिर गएको छ।

आगो द्रुत गतिमा मानव बस्तीतर्फ फैलिएपछि स्थानीय प्रशासनले हजारौँ बासिन्दालाई तत्काल घर छोड्न (आकस्मिक निकासी आदेश) जारी गरेको छ।

लस एन्जलसको डाउनटाउन क्षेत्रबाट करिब ६० किलोमिटर (४० माइल) उत्तरपश्चिममा अवस्थित, करिब एक लाख २५ हजार जनसङ्ख्या भएको सिमी भ्यालीमा सोमबार बिहानैदेखि आगो सल्किएको थियो।

क्यालिफोर्नियाको अग्निनियन्त्रण निकाय ‘क्यालफायर’ का अनुसार सोमबार साँझसम्म प्रतिघण्टा ५६ किलोमिटरको गतिमा चलेको विनाशकारी हावाले आगो निभाउने प्रयासलाई असफल बनाउँदै अझ फैलाउन मद्दत गरेको थियो। हावाको यही तीव्र गतिका कारण आगो छोटो समयमै ५५२ हेक्टर (एक हजार ३६४ एकड) क्षेत्रफलमा फैलिसकेको छ।

आगलागीका कारण कम्तीमा एउटा घर जलेर नष्ट भएको पुष्टि भए पनि हालसम्म कुनै मानवीय क्षति वा कोही घाइते भएको विवरण भने आएको छैन। आगो थप घना बस्तीतर्फ सोझिने जोखिम बढेपछि अधिकारीहरूले सिमी भ्याली र छिमेकी सहर ‘थाउजेन्ड ओक्स’ का विभिन्न भागमा तत्काल घर खाली गर्न कडा आदेश दिएका छन्।

यसका साथै उत्तरी लस एन्जलसका धेरै आवासीय क्षेत्रमा ‘निकासी चेतावनी’ जारी गरिएको छ। स्थानीय प्रशासनले नागरिकहरूलाई आफ्ना महत्त्वपूर्ण र आवश्यक सामग्रीहरू तयारी अवस्थामा राख्न र स्थिति प्रतिकूल बन्नासाथ तुरुन्त सुरक्षित स्थानतर्फ लाग्न अपिल गरेको छ।

लस एन्जलसकी मेयर करेन बासले पत्रकार सम्मेलन आयोजना गर्दै चेतावनी जारी गरिएका क्षेत्रका बासिन्दालाई उच्च सतर्कता अपनाउन आग्रह गरेका छन्।

उनले तत्कालै सबैले घर छोड्नुपर्ने अवस्था नआए पनि सुक्खा मौसमका कारण परिस्थिति जुनसुकै बेला जटिल बन्न सक्ने भएकाले पूर्वतयारीमा रहनुपर्ने स्पष्ट पारे। मेयर बासका अनुसार हालको अवस्था हेर्दा आगो लस एन्जलस मुख्य सहरसम्म पुग्ने सम्भावना निकै कम छ। तर, मौसम र हावाको दिशामा आउने परिवर्तनले खतरा बढाउन सक्ने भएकाले सुरक्षा निकायहरूले चौबीसै घण्टा निगरानी गरिरहेका छन्।

सोमबार साँझतिर हावाको गति केही मत्थर भए पनि उच्च तापक्रम, न्यून आर्द्रता (हावामा चिस्यानको कमी) र अप्ठ्यारो भौगोलिक बनावटका कारण डढेलो पूर्ण रूपमा नियन्त्रणमा लिन अझै निकै चुनौतीपूर्ण रहेको क्यालफायरले जनाएको छ।

पछिल्ला वर्षहरूमा जलवायु परिवर्तन, लामो समयको खडेरी र अत्यधिक गर्मीका कारण अमेरिकाको पश्चिमी क्षेत्र, विशेष गरी क्यालिफोर्निया हरेक वर्ष यस्ता विनाशकारी वन तथा झाडीजन्य आगलागीको चपेटामा पर्दै आएको छ।