काठमाडौँ । प्रतिनिधिसभाको आइतबारको बैठकमा प्रधानमन्त्री बालेन्द्र शाहले सांसदहरूको प्रश्नको जवाफ दिएर बाहिरिएलगत्तै संसद्‌मा ठूलो विवाद र हंगामा भएको छ । लामो समयदेखिको मागपछि संसद्‌मा उपस्थित भएका प्रधानमन्त्री शाहले प्रत्येक राजनीतिक दलका एक–एक जना सांसदको जिज्ञासाको समाधान गरेर बैठकबाट बाहिरिएका थिए । तर, उनी निस्किएलगत्तै प्रतिपक्षी दलहरूले प्रक्रियाप्रति तीव्र असन्तुष्टि जनाउँदै हंगामा गरेका हुन् ।

बैठकको सुरुमै सभामुख डोलप्रसाद (डीपी) अर्यालले प्रधानमन्त्री शाहलाई बोल्ने समय दिएका थिए । प्रधानमन्त्री रोष्ट्रममा उभिएर सांसदहरूका प्रश्नको सामना गर्न तयार भएसँगै सभामुखले दलगत रूपमा प्रश्न सोध्नका लागि प्रत्येक दललाई २–२ मिनेटको समय उपलब्ध गराएका थिए ।

सो क्रममा कांग्रेसका अर्जुननरसिंह केसीलगायत विभिन्न दलका सांसदहरूले सोधेको प्रश्नको जवाफ दिँदै प्रधानमन्त्री शाहले सबै आयोगका प्रतिवेदनहरू एकमुष्ठ रूपमा अध्ययन गरेर सरकारले काम अघि बढाउने बताए । साथै, उपत्यकाको नदी किनारका सुकुमबासी व्यवस्थापनबारे टिप्पणी गर्दै उनले भने, “३५ वर्षमा हुन नसकेको सुकुमबासी व्यवस्थापन ३५ मिनेटमा नखोजौँ ।”

आफूलाई तोकिएका जिज्ञासाहरूको संक्षिप्त जवाफ दिएलगत्तै प्रधानमन्त्री शाह संसद् बैठकबाट बाहिरिएका थिए ।

प्रधानमन्त्री बैठक कक्षबाट बाहिरिएलगत्तै संसद्‌मा नियमापत्ति र विरोधको शृङ्खला सुरु भयो । प्रतिपक्षी दल नेकपा (एमाले) र श्रम संस्कृति पार्टीका सांसदहरूले प्रधानमन्त्रीको आकस्मिक जवाफदेहिता र हलुका रूपमा लिइएको प्रश्नोत्तर प्रक्रियाप्रति आपत्ति जनाउँदै उठेर बोल्न समय मागेका थिए ।

विपक्षी सांसदहरूले प्रतिनिधिसभा नियमावलीको नियम ५६ अनुसार प्रत्येक महिनाको पहिलो साता प्रधानमन्त्रीसँग प्रत्यक्ष र विस्तृत प्रश्नोत्तर कार्यक्रम सञ्चालन हुनुपर्नेमा, त्यसलाई छलेर केवल औपचारिकता मात्रै पूरा गरिएको भन्दै संसद्‌मा नाराबाजी र विरोध गरे ।

विपक्षी दलका सांसदहरूले लगातार सिटबाट उठेर विरोध गरिरहेपछि र बैठक सञ्चालनमा अवरोध पुर्‍याएपछि सभामुख डोलप्रसाद अर्याल आसनबाटै झोक्किएका छन् ।

सभामुख अर्यालले संसद् सचिवालयको सुझाव र स्थापित कार्यविधिअनुसार नै प्रधानमन्त्रीलाई समय दिइएको र सबै दललाई समेटिएको स्पष्ट पार्दै सांसदहरूलाई शान्त हुन र आफ्नो स्थानमा बस्न कडा निर्देशन दिएका थिए । तर, सभामुखको आग्रहलाई बेवास्ता गर्दै एमाले र श्रम संस्कृति पार्टीका सांसदहरूले नियमापत्ति जारी राखेपछि संसद् बैठक केहीबेर निकै तनावपूर्ण र अन्योलग्रस्त बनेको छ ।