तेहरान। अमेरिका र इरानबीचको प्रत्यक्ष सैन्य टकरावका कारण मध्यपूर्वको सुरक्षा अवस्था थप जटिल र संकटपूर्ण बन्दै गएको छ। इरानको इस्लामिक रिभोलुसनरी गार्ड कोर्प्स (आईआरजीसी) ले अमेरिकाका २१ वटा हवाई तथा नौसैनिक सैन्य अड्डाहरूमाथि भीषण आक्रमण गरेको दाबी गरेको छ।

इरानी सञ्चारमाध्यम आईएसएनएका अनुसार आईआरजीसीले अमेरिकी अत्याधुनिक एफ-३५ लडाकु विमानका ह्याङ्गरहरूलाई निशाना बनाउनुका साथै जोर्डनस्थित अल-अजराक अमेरिकी कमाण्ड तथा नियन्त्रण केन्द्र र मुवाफक साल्ती हवाई अड्डालाई ध्वस्त पारेको दाबी गरेको छ।

यसका साथै बहराइनमा रहेको अमेरिकी पाँचौं नौसैनिक बेडाको मुख्यालयमा समेत ड्रोन आक्रमण गरिएको इरानी पक्षको भनाइ छ। कुवेत र बहराइनस्थित अन्य अमेरिकी सैन्य अड्डाहरू पनि पुनः निशानामा परेको इरानी सरकारी सञ्चारमाध्यमहरूले जनाए पनि यी दाबीहरूको स्वतन्त्र पुष्टि हुन भने बाँकी छ।

यो पछिल्लो आक्रमण दक्षिणी इरानमा अमेरिकी सेनाले गरेको हमलाको प्रतिक्रियास्वरूप भएको इरानले जनाएको छ। यसअघि अमेरिकी केन्द्रीय कमाण्डले हर्मुज जलडमरूमध्यमा आफ्नो अपाचे हेलिकोप्टर खसालिएको घटनापछि इरानविरुद्ध ‘आत्मरक्षात्मक सैन्य कारबाही’ सुरु गरेको घोषणा गरेको थियो।

अमेरिकी राष्ट्रपति डोनाल्ड ट्रम्पले इरानी आक्रमणबाट अपाचे हेलिकोप्टर खसालिएको पुष्टि गर्दै अमेरिकाले यसको आवश्यक र कडा जवाफ दिने चेतावनी दिएका थिए। उक्त हेलिकोप्टरमा सवार दुवै चालक भने सकुशल उद्धार गरिएको अमेरिकी पक्षले जनाएको छ।

यसैबीच इरानका विदेशमन्त्री अब्बास अराघचीले अमेरिकालाई फारसी खाडी क्षेत्र तत्काल छाड्न चेतावनी दिँदै इरानमाथिको कुनै पनि आक्रमण वा धम्कीको कडा प्रतिकार गरिने स्पष्ट पारेका छन्। उनले देशका सशस्त्र बलहरू जुनसुकै चुनौतीको सामना गर्न पूर्ण रूपमा तयार रहेको बताएका छन्।

अमेरिका र इरानबीच बढ्दो यो सिधा सैन्य टकराव र इजरायल-इरान द्वन्द्वका कारण सिर्जित पछिल्ला घटनाक्रमले समग्र मध्यपूर्व क्षेत्रलाई नै नयाँ र गम्भीर सुरक्षा संकटतर्फ धकेल्ने भन्दै विश्वभरका भूराजनीतिक विश्लेषकहरूले गहिरो चिन्ता व्यक्त गरेका छन्।