काठमाडौं। नेपालको पूर्वी तथा मध्य भूभागमा मनसुनी वायुको प्रभाव क्रमशः विस्तार हुँदै गएको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, मधेश र बागमती प्रदेशका सम्पूर्ण भूभाग, गण्डकी प्रदेशको अधिकांश भूभाग र लुम्बिनी प्रदेशको पूर्वी भूभागमा मनसुनी वायुको स्पष्ट प्रभाव रहेको छ।

देशका बाँकी पश्चिमी भूभागहरूमा भने पश्चिमी वायु र स्थानीय वायुको आंशिक प्रभाव कायमै रहेको छ । यसै वातावरणीय मिश्रणका कारण देशको मौसममा कतै वर्षा त कतै अत्यधिक गर्मीको दोहोरो अवस्था देखिएको छ।

हाल देशको वायुमण्डलीय अवस्था नियाल्दा कोशी, मधेश, बागमती, गण्डकी र लुम्बिनी प्रदेशमा साधारणतया बादल लागेको छ भने कर्णाली र सुदूरपश्चिम प्रदेशको पहाडी तथा हिमाली भूभाग पनि बादलले घेरिएको छ।

सुदूरपश्चिम प्रदेशको तराई भूभागमा भने मौसम मुख्यतया सफा रहेको छ। हाल कोशी प्रदेशका थोरै स्थानहरूमा तथा बागमती, गण्डकी, लुम्बिनी र कर्णाली प्रदेशका एक-दुई स्थानमा मेघगर्जन र चट्याङसहित हल्कादेखि मध्यमसम्मको वर्षा भइरहेको छ।

आज दिउँसो पनि देशका हिमाली र पहाडी भूभागका साथै कोशी प्रदेशको तराई क्षेत्रमा साधारणतया बादल लाग्ने अनुमान गरिएको छ। मधेश प्रदेशका साथै बागमती र गण्डकी प्रदेशको तराई भूभागमा आंशिक बादल लाग्नेछ भने लुम्बिनी र सुदूरपश्चिम प्रदेशको तराई भूभागमा मौसम मुख्यतया सफा रहनेछ।

आज दिउँसो कोशी, बागमती र गण्डकी प्रदेशका हिमाली तथा पहाडी भूभागका थोरै स्थानहरूमा र लुम्बिनी, कर्णाली र सुदूरपश्चिम प्रदेशका पहाडी भूभागका एक-दुई स्थानमा मेघगर्जन र चट्याङसहित हल्कादेखि मध्यम वर्षा र हिमपातको सम्भावना रहेको छ।

तराई क्षेत्रतर्फ कोशी प्रदेशका थोरै स्थानमा तथा मधेश, बागमती र गण्डकी प्रदेशका तराईका थोरै स्थानमा वर्षाको सम्भावना रहँदा लुम्बिनी र सुदूरपश्चिम प्रदेशका तराई भूभागमा भने अत्यधिक गर्मीका कारण तातो लहर अर्थात् ‘लू’ चल्ने सम्भावना छ। बागमती र गण्डकी प्रदेशका तराई भूभागमा पनि आजको दिन निकै तातो हुने देखिएको छ।

आज रातिको मौसम पनि पूर्वी र पश्चिमी भूभागमा विभाजित हुने देखिन्छ। कोशी, बागमती र गण्डकी प्रदेशका हिमाली तथा पहाडी भूभाग र कोशी प्रदेशको तराई क्षेत्रमा साधारणतया बदली रहनेछ । मधेश प्रदेश, लुम्बिनी, कर्णाली र सुदूरपश्चिम प्रदेशको पहाडी भूभाग तथा बागमती र गण्डकी प्रदेशको तराईमा आंशिक बादल लाग्नेछ । लुम्बिनी र सुदूरपश्चिमको तराईमा भने राति पनि मौसम सफा नै रहनेछ।

रातिको समयमा कोशी प्रदेशको पहाडी भूभागका केही स्थानहरूमा तथा बागमती र गण्डकी प्रदेशको थोरै स्थानहरूमा मेघगर्जनसहित वर्षा र हिमपातको आकलन गरिएको  । कोशीको तराई र मधेश प्रदेशका एक-दुई स्थानमा पनि राति वर्षा हुन सक्ने भएकाले महाशाखाले आवश्यक सतर्कता अपनाउन अनुरोध गरेको छ।