काठमाडाैं। फिफा विश्वकप प्रतियोगिताअन्तर्गत समूह ‘के’ को आफ्नो दोस्रो खेलमा पोर्चुगलले उज्वेकिस्तानमाथि ५-० गोलअन्तरको फराकिलो जित दर्ता गरेको छ। पोर्चुगललाई सानदार जित दिलाउने क्रममा कप्तान क्रिस्टियानो रोनाल्डोले दुई गोल गर्दै टोलीको नेतृत्व गरे।

खेलको छैटौँ मिनेटमा नै कर्नरबाट आएको बललाई आकर्षक ढङ्गले जाली चुमाउँदै रोनाल्डोले टोलीलाई सुरुवाती अग्रता दिलाएका थिए । त्यसपछि खेलको १७औँ मिनेटमा नुनो मेन्डेसले गोल गर्दै पोर्चुगलको अग्रतालाई दोब्बर बनाए। खेल एकतर्फी जस्तै बनेको अवस्थामा ३९औँ मिनेटमा रोनाल्डोले व्यक्तिगत दोस्रो गोल गरेपछि पोर्चुगल पहिलो हाफमै ३-० को बलियो स्थितिमा पुग्यो ।

दोस्रो हाफमा पनि आफ्नो दबाब कायमै राखेको पोर्चुगलका लागि ६०औँ मिनेटमा अब्दवोहिद नेमातोव र ८७औँ मिनेटमा राफाएल लीओले थप एक-एक गोल गरेपछि उज्वेकिस्तान ५-० को भारी गोलअन्तरले पराजित हुन पुग्यो ।

यसअघि आफ्नो पहिलो खेलमा कङ्गोसँग बराबरी खेल्दै अंक बाँडेको पोर्चुगल यो जितसँगै चार अंक बटुलेर समूह ‘के’ को शीर्ष स्थानमा उक्लिएको छ। लगातार दोस्रो हार ब्यहोरेको उज्वेकिस्तान भने अंक तालिकाको पुछारमा संकटपूर्ण अवस्थामा छ।

विश्वकपअन्तर्गत आजै अन्य रोमाञ्चक खेलहरू पनि हुँदैछन्, जसअन्तर्गत इङ्ल्याण्ड र घाना, पानामा र क्रोएसिया, तथा कोलम्बिया र कङ्गोबीच प्रतिस्पर्धा हुने तालिका छ ।