काठमाडौं। साउदी अरबको पूर्वी तटीय क्षेत्रमा अवस्थित प्रमुख तेल टर्मिनल ‘रास तनुरा’ मा आइतबार बिहान एउटा भीषण हेलिकप्टर दुर्घटना भएको छ। विश्वकै सबैभन्दा ठूलो तेल उत्पादक कम्पनी ‘साउदी अरामको’ द्वारा सञ्चालित उक्त हेलिकप्टर स्थानीय समयानुसार बिहानको करिब ६:०० बजे दुर्घटनाग्रस्त भएको हो।

साउदी अरबको ऊर्जा मन्त्रालय र आधिकारिक सरकारी सञ्चारमाध्यम ‘साउदी प्रेस एजेन्सी’ का अनुसार यस दुःखद दुर्घटनामा परि हेलिकप्टरमा सवार सबै १४ जनाको घटनास्थलमै मृत्यु भएको छ। मन्त्रालयले जारी गरेको आधिकारिक विज्ञप्ति अनुसार, मृत्यु हुने सबै १४ जना साउदी अरबका नागरिक रहेका छन्।

ऊर्जा मन्त्रालयले यस अकल्पनीय दुर्घटनाप्रति गहिरो दुःख व्यक्त गर्दै मृतकका परिवार तथा आफन्तजनप्रति हार्दिक समवेदना प्रकट गरेको छ। साथै, उनीहरूलाई ‘शहीद’ को दर्जा दिँदै दिवङ्गत आत्माको चीर शान्तिको कामना गरिएको छ।

यो दुर्घटना यस्तो समयमा भएको छ, जब अमेरिका र इरानबीच जारी युद्ध रोक्नका लागि भइरहेका कूटनीतिक प्रयासहरूकै बीच साउदी अरबले झन्डै चार महिनापछि गत शुक्रबार (२६ जुन) देखि मात्र रास तनुरा टर्मिनलबाट कच्चा तेलको लोड-अन पुनः सुचारु गरेको थियो।

पश्चिम एसियाली देशहरूले तेल र ग्यासको उत्पादन तथा निर्यात बढाउने होडबाजी गरिरहेका बेला यो ठूलो औद्योगिक एवं प्राविधिक दुर्घटना हुन पुगेको हो। दुर्घटनाको मुख्य कारण भने अझैसम्म स्पष्ट हुन सकेको छैन।

साउदी अरबको नागरिक उड्डयन प्राधिकरण र सम्बन्धित सुरक्षा निकायहरूका प्राविधिक टोलीले दुर्घटनास्थललाई नियन्त्रणमा लिई सुक्ष्म अनुसन्धान सुरु गरिसकेका छन्। हेलिकप्टरमा कुनै प्राविधिक खराबी आएको थियो वा खराब मौसमका कारण दुर्घटना भयो भन्नेबारे ब्लाक बक्स र अन्य उपलब्ध प्रमाणहरूको विश्लेषण गरिएपछि मात्र वास्तविक तथ्य बाहिर आउने अधिकारीहरूले जनाएका छन्।