काठमाडौं । वैदेशिक रोजगारीका लागि न्यूजिल्यान्ड पठाइदिन्छु भन्दै लाखौं रुपैयाँ ठगी गरेको अभियोगमा प्रहरीले एक जना भारतीय नागरिकलाई काठमाडौंबाट पक्राउ गरेको छ।

काठमाडौं महानगरपालिका-१८ मा बस्दै आएका भारत बिहार गोपालगञ्ज घर भएका ४२ वर्षीय संजय कुमारलाई प्रहरीले नियन्त्रणमा लिएको हो।

संजयले आकर्षक तलबको प्रलोभन देखाएर न्यूजिल्यान्ड पठाइदिने बहानामा एक जना पीडितबाट ९ लाख ८० हजार रुपैयाँ लिई सम्पर्कविहीन भएको प्रहरीले जनाएको छ।

पीडितको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको विशेष टोलीले उनलाई काठमाडौं महानगरपालिका-१६ बाट बुधबार पक्राउ गरेको हो।

पक्राउ परेका संजयलाई थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको अपराध अनुसन्धान कार्यालयले जनाएको छ।