वाशिङटन डीसी। अमेरिकी सेनाले आइतबार बिहान इरानका करिब १४० वटा रणनीतिक सैन्य लक्ष्यहरूमाथि शक्तिशाली हवाई आक्रमण गरेको छ।

अमेरिकी सेन्ट्रल कमाण्ड (सेन्टकम) का अनुसार यो यसै साताभित्र इरानविरुद्ध गरिएको तेस्रो चरणको ठुलो सैन्य कारबाही हो।

यसपटकको आक्रमणमा विशेष गरी इरानका मिसाइल तथा ड्रोन अड्डाहरू, नौसैनिक क्षमता, गोलाबारुद भण्डारण केन्द्रहरू, सञ्चार सञ्जाल तथा तटीय निगरानी स्थलहरूलाई मुख्य निशाना बनाइएको सेन्टकमले स्पष्ट पारेको छ।

सेन्टकमले सामाजिक सञ्जाल एक्स (ट्विटर) मार्फत जारी गरेको आधिकारिक विज्ञप्तिअनुसार यस साताको तीन रातसम्म लगातार सञ्चालन गरिएका सैन्य कारबाहीहरूमा इरानका ३०० भन्दा बढी रणनीतिक लक्ष्यहरू ध्वस्त पारिएको दाबी गरिएको छ।

अमेरिकी राष्ट्रपतिको प्रत्यक्ष निर्देशनमा चालिएको यस कदमको मुख्य उद्देश्य इरानको व्यापारिक जहाज र नागरिक जलयात्रामाथि आक्रमण गर्ने क्षमतालाई पूर्ण रूपमा कमजोर पार्नु रहेको अमेरिकी पक्षको भनाइ छ।

यसअघि स्ट्रेट अफ होर्मुज (हर्मुज जलमार्ग) हुँदै अघि बढिरहेको एउटा कन्टेनर जहाजमाथि इरानले आक्रमण गरेपछि अमेरिकाले यो कडा प्रत्याक्रमण गरेको सेन्टकमले जनाएको छ।

उता, इरानको इस्लामिक रिभोलुसनरी गार्ड कोर्प्स (आईआरजीसी) ले भने अमेरिकी दाबीको खण्डन गर्दै आफ्नो अनुमतिविना अनधिकृत मार्ग प्रयोग गरेर हर्मुज जलडमरूमध्य पार गर्न खोजेको जहाजलाई केवल चेतावनीस्वरूप मात्र गोली प्रहार गरिएको दाबी गरेको छ। दुवै देशको यो सैन्य टकरावले खाडी क्षेत्रमा युद्धको खतरा झनै बढाएको छ।