काठमाडौं। सुनसरीमा घटेको पछिल्लो संवेदनशील घटना र त्यसले उत्पन्न गराएको तनावपूर्ण वातावरणलाई साम्य पार्दै सामाजिक सद्भाव कायम राख्न सत्ता नेतृत्वकर्ता दल राष्ट्रिय स्वतन्त्र पार्टी (रास्वपा) को आह्वानमा सर्वदलीय बैठक जारी छ।

रास्वपाका सभापति रवि लामिछानेले आयोजना गरेको उक्त बैठक सिंहदरबारस्थित सार्वजनिक लेखा समितिको सभाहलमा बसिरहेको छ। बैठकमा देशका प्रमुख राजनीतिक दलका शीर्ष नेताहरूको बाक्लो उपस्थिति रहेको छ।

बैठकमा सहभागी हुन नेपाली कांग्रेसका सभापति गगन थापा, संसदीय दलका नेता भीष्मराज आङ्देम्बे, नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’, नेकपा (एमाले) का महासचिव शंकर पोखरेल, श्रम संस्कृति पार्टीका आर्यन राई, राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन, सांसद खुस्बु ओली तथा जनमत पार्टीका अध्यक्ष डा. सीके राउतलगायतका नेताहरू सिंहदरबार पुगेका छन्।

सुनसरीको घटनापछि सिर्जित असहज परिस्थितिलाई सामान्य बनाउन स्थानीय प्रशासन तथा सुरक्षा निकायहरूले प्रयास जारी राखेका छन्। तर, सम्भावित सामाजिक द्वेष र भ्रमहरूलाई चिर्न राजनीतिक तहबाटै एउटा एकीकृत र स्पष्ट सन्देश दिनु आवश्यक देखिएकाले सर्वदलीय बैठक डाकिएको रास्वपाका महामन्त्री विपिन आचार्यले जानकारी दिए।

“अत्यन्तै संवेदनशील र दुःखद घटनापछि सिर्जित परिस्थितिलाई लिएर समाजमा द्वेष नफैलियोस् र शान्ति-सुरक्षा तथा सामाजिक सद्भाव कायम रहोस् भन्ने हाम्रो मुख्य ध्येय हो,” महामन्त्री आचार्यले भने, “प्रशासनिक कदमहरूसँगै राजनीतिक नेतृत्वले पनि एकै ठाउँ उभिएर सामूहिक अपिल गर्नु अहिलेको प्राथमिक आवश्यकता भएकाले यो छलफल आयोजना गरिएको हो।”

बैठकबाट सुनसरी घटनाको निष्पक्ष छानबिन, शान्ति-सुरक्षाको पूर्ण प्रत्याभूति र सद्भाव कायम राख्नका लागि सबै दलहरूको तर्फबाट संयुक्त वक्तव्य वा अपिल जारी हुने अपेक्षा गरिएको छ।