ललितपुर । ललितपुरको बागमती गाउँपालिका–३ स्थित काल्चेमाल्टामा पहिरो खसेपछि कान्ति लोकपथ पूर्ण रूपमा अवरुद्ध भएको छ।

जिल्ला प्रहरी कार्यालयका अनुसार भट्टेडाँडाबाट करिब ५ किलोमिटर अगाडि ठूलो पहिरो खस्दा सडक यातायात ठप्प भएको हो। पहिरोका कारण सो मार्ग भएर चल्ने सवारी साधनहरू बीच बाटोमै रोकिएका छन्।

अहिले सडक विभागसँग समन्वय गरी पहिरो पन्छाउने र राजमार्ग सञ्चालनमा ल्याउने प्रयास भइरहेको प्रहरीले जनाएको छ। प्रहरीले सो बाटो भएर यात्रा गर्ने चालक तथा यात्रुहरूलाई वैकल्पिक मार्गको प्रयोग गर्न वा पहिरो नहटुञ्जेल धैर्य गर्न आग्रह गरेको छ।