काठमाडौं। दशैं, तिहारलगायतका प्रमुख चाडपर्वहरू नजिकिँदै गर्दा काठमाडौँ उपत्यकामा ट्राफिक प्रहरीले आफ्नो सक्रियतालाई थप बढाएको छ।

चाडपर्वको समयमा सवारीसाधनको अत्यधिक चाप बढ्ने, लामो तथा छोटो दूरीका यात्रुहरूको आवागमनमा वृद्धि हुने र यात्राका क्रममा हुनसक्ने सम्भावित जोखिमलाई मध्यनजर गर्दै ट्राफिक प्रहरीले सचेतना अभियानलाई तीव्रता दिएको छ।

चाडपर्वका समयमा हुनसक्ने सवारी दुर्घटना न्यूनीकरण गर्न, यात्रुलाई सहज र सुरक्षित यात्रा सुनिश्चित गर्न तथा चालकलाई थप जिम्मेवार बनाउने प्रमुख उद्देश्यका साथ उपत्यकाका विभिन्न स्थानहरूमा सचेतनामूलक कार्यक्रमहरू सञ्चालन भइरहेको काठमाडौँ उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक सुरेशप्रसाद काफ्लेले जानकारी गराएका छन्।

काठमाडौँ उपत्यका ट्राफिक प्रहरी कार्यालयका अनुसार यात्रुको बढी आवागमन हुने क्षेत्र, मुख्य सडक तथा सवारीसाधन सञ्चालन हुने प्रमुख स्थानहरूमा केन्द्रित भएर उक्त सचेतना अभियान अगाडि बढाइएको छ।

ट्राफिक प्रहरीले काठमाडौँको नयाँ बसपार्क, नागढुङ्गा, कोटेश्वरलगायतका प्रमुख क्षेत्रहरूमा विशेष अभियान सञ्चालन गरिरहेको छ। विशेषगरी लामो दूरीका सार्वजनिक सवारीसाधन सञ्चालन हुने नयाँ बसपार्क र उपत्यका प्रवेश गर्ने तथा बाहिरिने मुख्य नाकाहरू नागढुङ्गा र कोटेश्वर क्षेत्रमा ट्राफिक व्यवस्थापनमा विशेष निगरानी बढाइएको कुरा उनीहरूले जनाएका छन्।

उक्त अभियानअन्तर्गत लामो तथा छोटो दूरीमा सञ्चालन हुने सार्वजनिक सवारीसाधनका चालक र यात्रुहरूलाई ट्राफिक नियम, सुरक्षित यात्रा र सडक अनुशासनबारे जानकारी दिने तथा सवारीसाधनको यान्त्रिक अवस्था परीक्षण र मादक पदार्थ सेवन (मापसे) जाँचलाई समेत उच्च प्राथमिकतामा राखिएको छ।

चाडपर्व सुरु भएसँगै सवारी दुर्घटना न्यूनीकरणका लागि उपत्यकाका प्रमुख नाकाहरूमा नागरिक सचेतना अभियानसहित ट्राफिक प्रहरीको सक्रियता थप बढाइएको उनले बताएका छन्।

वरिष्ठ उपरीक्षक काफ्लेले यससन्दर्भमा स्पष्ट पार्दै भनेका छन्, “ट्राफिक प्रहरी जहिले पनि सडकमै खटिएको छ। अहिले चाडपर्वको समय सुरु भएकाले हामीले ट्राफिक सचेतना र जनचेतनामूलक कार्यक्रमलाई थप अघि बढाएका छौँ। हाम्रो मुख्य उद्देश्य सवारी दुर्घटना न्यूनीकरण गर्नु हो।”

उनले बताएअनुसार चाडपर्वका समयमा यात्रुको आवागमन अत्याधिक बढ्ने भएकाले सवारीसाधनको सुरक्षित सञ्चालन, चालकको जिम्मेवारी र ट्राफिक नियमको पालना गर्नु विशेष महत्त्वपूर्ण हुन्छ। सम्भावित दुर्घटनाहरू रोक्न र यात्रुलाई गन्तव्यसम्म सुरक्षित रूपमा पुग्ने वातावरण बनाउन ट्राफिक प्रहरीले सचेतना कार्यक्रमहरूलाई प्राथमिकतामा राखेको छ।

माइकिङमार्फत यात्रु र चालकलाई सचेतना

ट्राफिक प्रहरीले सडक तथा सवारीसाधन सञ्चालन हुने प्रमुख स्थानहरूमा माइकिङ गरी सर्वसाधारणलाई ट्राफिक नियमहरूको अनिवार्य पालना गर्न आग्रह गरिरहेको छ।

यात्राका क्रममा विशेष सावधानी अपनाउन, सवारीसाधनको अवस्था राम्ररी जाँच गरेर मात्र यात्रा गर्न तथा चालकले सडक अनुशासन कडा रूपमा कायम राख्नुपर्ने विषयमा जानकारी दिँदै आएको कुरा सम्बन्धित अधिकारीहरूले बताएका छन्।

काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले सुरक्षित यात्रा सुनिश्चित गर्ने, जिम्मेवार चालकको व्यवहार विकास गर्ने र सवारी दुर्घटना न्यूनीकरण गर्ने प्रमुख उद्देश्यले सचेतनामूलक कार्यक्रमहरू सञ्चालन गरिएको जानकारी गराएका छन्।

प्रवक्ता सुवेदीले भनेका छन्, “सुरक्षित यात्रा, जिम्मेवार चालक र दुर्घटनामुक्त सडक निर्माणमा ट्राफिक प्रहरी सक्रिय रूपमा खटिएको छ। चाडपर्व सबैको उल्लासमय तरिकाले बितोस् भन्ने ट्राफिक प्रहरीको चाहना हो।”

अरु बेलाको तुलनामा चाडपर्वका समयमा नागरिकहरूले आफ्नो यात्रालाई सुरक्षित तुल्याउन अझ बढी सजगता र सचेतना अपनाउनुपर्ने आवश्यकतामा जोड दिँदै प्रवक्ता सुवेदीले ट्राफिक नियमको प्रभावकारी पालना गराउन प्रहरीको व्यापक परिचालन सँगसँगै जनचेतनामूलक गतिविधिहरूलाई पनि अघि बढाइएको कुरा जनाएका छन्। सडकमा हुने सम्भावित जोखिमबारे यात्रु तथा चालकलाई समयमै जानकारी गराउँदा दुर्घटना रोकथाममा ठيलो सहयोग पुग्ने प्रहरीको अपेक्षा रहेको छ।

सवारीसाधनको अवस्था परीक्षण र मापसे जाँचमा विशेष जोड

सार्वजनिक सवारीसाधनबाट चाडपर्वका समयमा यात्रा गर्ने यात्रुहरूको सङ्ख्या व्यापक रूपमा बढ्ने भएकाले सवारीसाधनको यान्त्रिक अवस्था र चालकको जिम्मेवारीलाई ट्राफिक प्रहरीले विशेष ध्यान दिएको जनाइएको छ।

यस अभियानअन्तर्गत सवारीसाधनको यान्त्रिक परीक्षण गर्नुका साथै चालकले मादक पदार्थ सेवन गरी सवारी चलाए वा नचलाएको विषयमा कडाइका साथ जाँचसमेत गरिँदै आएको छ।

लामो दूरीको यात्रामा निस्कने सवारीसाधनको अवस्था, चालकको सतर्कता र सडकमा अपनाउनुपर्ने सावधानीले यात्राको सुरक्षामा महत्त्वपूर्ण भूमिका खेल्ने भएकाले यस्ता विषयमा यात्रु तथा चालकहरूलाई सचेत गराइएको छ।

सवारीसाधनको अवस्था कमजोर हुँदा वा चालकले लापरबाही गर्दा दुर्घटनाको जोखिम धेरै हुन सक्ने भएकाले यात्रा सुरु गर्नुभन्दा अगाडि आवश्यक सावधानी अपनाउन प्रहरीले आग्रह गरेका छन्।

त्यसैगरी, सडकमा सवारी चलाउँदा ट्राफिक सङ्केतहरूको पालना गर्ने, तीव्र गतिमा सवारी नचलाउने, क्षमताभन्दा बढी यात्रुहरू नराख्ने, यात्रुहरूलाई सुरक्षित रूपमा चढाउने र ओराल्ने तथा चालकले आफ्नो जिम्मेवारी पूर्ण रूपमा पूरा गर्ने विषयमा समेत सचेतना दिँदै आएको कुरा उनीहरूले बताएका छन्।

सुरक्षित र व्यवस्थित यात्राका लागि ट्राफिक प्रहरीको आग्रह

दसैँ, तिहारलगायतका चाडपर्वहरूमा परिवार तथा आफन्तजनसँग भेटघाट गर्न, आफ्नो घर फर्किन र विभिन्न धार्मिक तथा पर्यटकीय स्थलहरूमा पुग्न नागरिकहरूको आवागमन तीव्र रूपमा बढ्ने गर्दै आएको छ। त्यस्तो समयमा सडकमा सवारीसाधनको चाप अधिक बढ्न सक्ने भएकाले चालक, यात्रु र पैदलयात्री सबैले उच्च सावधानी अपनाउनुपर्ने ट्राफिक प्रहरी प्रमुख काफ्लेको भनाइ रहेको छ।

ट्राफिक प्रहरीले यात्राका क्रममा ट्राफिक नियमको पूर्ण पालना गर्न, मादक पदार्थ सेवन गरी सवारीसाधन नचलाउन, सवारीसाधनको अवस्था राम्ररी जाँच गरेर मात्र यात्रा गर्न तथा चालकले थकान महसुस भएमा सुरक्षित रूपमा विश्राम लिन विशेष आग्रह गरेको छ। यात्रुहरूले पनि सवारीसाधन चढ्दा र ओर्लँदा पूर्ण सावधानी अपनाउन तथा यात्राका क्रममा चालकलाई अनावश्यक दबाब नदिन अनुरोध गरेका छन्।

चाडपर्वलाई सुरक्षित, व्यवस्थित र उल्लासमय बनाउन प्रहरीको निगरानी तथा सचेतना अभियान सँगसँगै नागरिकहरूको जिम्मेवार व्यवहार पनि उत्तिकै आवश्यक रहेको कुरामा जोड दिइएको छ। ट्राफिक नियमको उचित पालना र सावधानीपूर्ण यात्राले दुर्घटनाको जोखिम कम गर्न ठूलो सहयोग पुर्याउने भएकाले चाडपर्वका समयमा विशेष सतर्कता अपनाउन ट्राफिक प्रहरीले सबैमा हार्दिक आग्रह गरेका छन्।

काठमाडौँ उपत्यका ट्राफिक प्रहरी कार्यालयले चाडपर्वको अवधिभरि यात्रुहरूको सहजता र सडक सुरक्षालाई उच्च प्राथमिकतामा राख्दै यस्ता सचेतनामूलक गतिविधिहरू तथा आवश्यक जाँचलाई निरन्तरता दिने जनाएको छ।

उपत्यका ट्राफिक प्रहरी कार्यालयले यात्रुहरूलाई सुरक्षित यात्राका लागि सवारीसाधनमा यात्रा गर्नुपूर्व आवश्यक सावधानी अपनाउन तथा चालकहरूलाई क्षमताभन्दा बढी यात्रुहरू नबोक्न, तीव्र गतिमा सवारी नचलाउन र ट्राफिक नियमको पूर्ण पालना गर्न विशेष आग्रहसमेत गरेका छन्।