काठमाडौं। इजरायलमा सम्पन्न संसदीय निर्वाचनपछि सरकार गठनका लागि तीव्र बहुमत जुटाउने प्रयास भइरहँदा अरब दलहरूले विपक्षी समूहसँग सहकार्य गर्ने स्पष्ट संकेत दिएका छन्। यससँगै मुलुकमा यहुदी र अरब समुदायको साझा साझेदारीमा नयाँ सरकार निर्माण गर्न चौतर्फी दबाब समेत बढेको छ।

प्रारम्भिक प्रक्षेपण अनुसार प्रधानमन्त्री बेन्जामिन नेतान्याहुको लिकुड पार्टीले २६ सिट जित्ने देखिएको छ। उनको सत्ताधारी गठबन्धनले जम्मा ५३ सिट प्राप्त गर्ने अनुमान गरिएको छ, जुन सरकार बनाउन आवश्यक ६१ सिटको स्पष्ट बहुमतभन्दा निकै कम हो।

अर्कातिर, मुख्य विपक्षी दलहरूले ४८ सिट र अरब दलहरूले १९ सिट जित्ने आंकलन छ। हाल निर्वाचन आयोगले सैनिक, कैदी तथा स्वास्थ्यकर्मी लगायतका मतदाताको ‘दोहोरो खाम’ मा रहेका मतपत्रहरूको गणना जारी राखेको छ।

यसैबीच, बुधबार राति डेमोक्रेट्स पार्टीको नेतृत्वमा प्रदर्शनकारीहरूले सडकमा ओर्लिएर यहुदी र अरबको संयुक्त सरकार गठन गर्न जोडदार माग गरेका छन्।

उक्त पार्टीले देशमा समानता, न्याय र दिगो शान्तिमा आधारित भविष्य निर्माणका लागि अरब दलहरूसँग हात मिलाउन विपक्षी नेताहरूलाई औपचारिक आह्वान गरेको छ।

डेमोक्रेट्सका प्रमुख यायर गोलानले परिवर्तनको पक्षमा पछाडि हट्न नहुने र विपक्षी समूहसँग सरकार बनाउने पर्याप्त बहुमत रहेको दाबी गर्दै तत्काल अरब दलहरूसँग वार्ता थाल्न आग्रह गर्नुभयो। उहाँले यो ऐतिहासिक मोडमा राजनीतिक नेतृत्वले उच्च साहस प्रदर्शन गर्नुपर्ने आवश्यकता औंल्याए।

अर्कोतर्फ, अरब दलहरूको संयुक्त सूचीले पनि नेतान्याहु नेतृत्वको सरकारको विकल्प खडा गर्न राजनीतिक सहकार्यका लागि आफूहरू तयार रहेको स्पष्ट पारेको छ।

तर, त्यसका लागि अरब समुदायको अधिकारको सुनिश्चितता, वर्षौंदेखि चल्दै आएका विभेदकारी नीतिहरूमा पुनरावलोकन र पूर्ण समानतामा आधारित साझेदारी हुनुपर्ने शर्त उनीहरूले अघि सारेका छन्।

विपक्षी गठबन्धनका प्रमुख नेता गदी आइसेनकोटले प्यालेस्टाइनसम्बन्धी रणनीति र इरानविरुद्धका कदम जस्ता संवेदनशील विषयमा ठोस सहमति जुटाउन ठूलो चुनौती भए तापनि नयाँ सरकार गठनको प्रयासलाई निरन्तरता दिनुभएको छ। उहाँले वर्तमान सरकारप्रति आम जनताको अविश्वास र आक्रोश चुलिएको दाबी गर्नुभयो।

बढ्दो राजनीतिक अन्योलका बीच राष्ट्रपति आइज्याक हर्जोगले फेरि अर्को मध्यावधि निर्वाचनमा जानुपर्ने परिस्थिति टार्न सबै राजनीतिक दलहरूलाई आग्रह गर्नुभएको छ।

नेतान्याहुलाई सत्ताबाट हटाउने साझा एजेन्डामा विपक्षीहरूबीच सहकार्यको ढोका खुला रहे पनि गहन नीतिगत मतभेद सुल्झाउन सहज देखिएको छैन। यद्यपि, रणनीतिक च्याँखे दाउ फेरेर नयाँ समीकरण बनाउँदै पुनः सत्ता टिकाइराख्ने नेतान्याहुको प्रयास भने अझै जारी छ।