काठमाडौं। नेपाली बैंकका एटिएम मेसिनको सिस्टम ह्याक गरेर बैंकका ग्राहकको खाताबाट अवैध रुपमा करोडौं रकम निकाल्ने चिनियाँ गिरोहले चीनमै योजना बनाएर नेपाल प्रवेश गरेको खुलेको छ । उनीहरु चीनमा योजना बनाएर नेपाल प्रवेश गरी नेपालमा विदा भएको दिन बैंकको एटिएम लुटेर भोलिपल्टै चीन फर्किने योजनामा थिए ।

उनीहरु शुक्रबार मात्रै चीनबाट नेपाल आएका थिए । शुक्रबार नेपाल आएर शनिबार नेपालमा विदा भएको दिन एटिएम लुटेर तत्कालै चीन फर्किने उनीहरुको योजना थियो । उनहिरुले शनिबार एटिएमबाट पैसा निकाल्ने क्रममा सम्बन्धित बैंकले एटिएम बुथबाट अस्वभाविक रुपमा रकम निकालिएको देखिएपछि प्रहरीलाई खबर गरेको थियो । उनहिरुलाई हिजो बेलुकी नै पक्राउ गरिएको हो ।

महानगरीय प्रहरी परिसरका प्रवक्ता होविन्द्र बोगटीका अनुसार सूचना पाएपछि प्रहरी दरबारमार्गस्थित नबिल बैंकको एटिएम पुगेको थियो । त्यहाँ चिनिया नागरिक झु लियाङगाङले एटिएम बुथबाट नक्कली भिसा कार्ड प्रयोग गरेर पैसा निकाल्दै थिए । प्रहरीले उनलाई नियन्त्रणमा लिएर उनको चेकजाँच गर्दा २० थान नक्कली भिसा कार्ड भेटियो । त्यसपछि उनलाई सोधपुछ गर्ने क्रममा उनले आफूहरु बसेको होटलको जानकारी दिए ।

उनले दिएको जानकारीको आधारमा प्रहरी हात्तिसारस्थित माया मनोहरबुटिकमा पुग्यो । त्यहाँ प्रहरी पुग्दा त्यहाँ पहिल्यैदेखि रहेका ह्याकरहरु लिफ्ट प्रयोग गरेर भाग्ने प्रयास गर्दै गर्दा पक्राउ परे । उनीहरु बसेको कोठा नम्बर २०१, ६०२ र ६०४ मा खानतलासी गर्दा १३२ थान नक्कली भिसा कार्ड, १७ थान सक्कली भिसा कार्ड, १ थान कार्ड प्रिन्टर मेसिन, मोवाइल ६ थान, ल्यापटप १ थान, डाटा कार्ड एक थान बरामद गरेको छ ।

झु लियाङगाङले दिएको जानकारीका आधारमा होटलबाट लुओ जिआलेइ, लिन जियाङमेङ, क्यु युङकिङ र चेन बिन बिन पक्राउ परेका हुन् । उनीहरुको साथबाट नेपाली मुद्रा १ करोड २६ लाख २९ हजार ४५, अमेरिकी डलर ९ हजार १ सय ८, चिनिया युआन ११ सय ९१, युरो २५०, कम्बोडियन मुद्रा ५ हजार, हङकङ डलर ८० समेत बरामद गरिएको छ ।