मुम्बइ। भारतका बरिष्ठ सत्याग्रही समाजसेवी अन्ना हजारेले शुक्रबार महाराष्ट्रका मुख्यमन्त्री उद्धव ठाकरेलाई पत्र लेख्दै आफूलाई कुनै किसिमको सुरक्षा आवश्यक नभएको बताएका छन् । उनले पत्रमा यदि आफूलाई केही भएमा त्यसको जिम्मेवार आफैं हुने उल्लेख गरेका छन् । महिलाको सुरक्षाको मुद्दामा अन्ना आफ्नो गाउँ रालेगण सिद्धीमा २० डिसेम्बरदेखि मौन ब्रतमा छन् ।

अन्नाले हुलाकमार्फत पठाएको पत्रमा अगाडि लेखेका छन् ‘मन्दिरमा बस्ने म जस्तो एक फकीरको सुरक्षामा सरकार मोटो रकम खर्च गरिरहेको छ । नागरिकबाट करको रुपमा प्राप्त पैसाको यसरी दुरुपयोग भएको हेर्न सकिन्न । अरुलाई सुरक्षा गहनाजस्तो लाग्छ होला तर मेरो लागि यो राम्रो कुरा होइन । मलाई केही मानिसहरुले धम्की दिएका छन् तर म मर्न डराउँदिन । सुरक्षाका बावजुद कोही मर्दैन भन्ने ग्यारेन्टी दिन सकिन्न किनकि पूर्व प्रधानमन्त्रीहरु इन्दिरा गान्धी र राजीव गान्धीको कडा सुरक्षाका बीच हत्या गरिएको थियो ।’

महाराष्ट्रको सत्ता सम्हालेपछि उद्धव सरकारले राज्यका प्रमुख व्यक्तिहरुको सुरक्षामा फेरबदल गरेको हो । राज्य सरकारको सुरक्षा समितिले ९० जनाको सुरक्षाको समीक्षा गरेको थियो । त्यसपछि अन्नालाई जेड श्रेणीको सुरक्षा दिने निर्णय भएको थियो । जेड श्रेणीको सुरक्षामा ४ देखि ५ जना एनएसजी कमाण्डोसहित २२ जना सुरक्षाकर्मी परिचालन हुन्छन् । यसअघि अन्नालाई वाइ श्रेणीको सुरक्षा दिइन्थ्यो । अहिलेसम्म अन्नाको यो पत्रको जवाफमा मुख्यमन्त्री वा गृहमन्त्रीको तर्फबाट कुनै प्रतिक्रिया आएको छैन ।