काठमाडौं। नेपालमा कोरोना भाइरसबाट संक्रमित भएका पहिलो र एकमात्र व्यक्ती स्वस्थ भएर काममा फर्केका छन्।

बीबीसी नेपाली सेवाले ती संक्रमित व्यक्ती काममा फर्केको समाचार प्रकाशित गरेको छ।

ती ३१ वर्षीय व्यक्ति चिनियाँ शहर वुहानबाट रुघाखोकी लागेको अवस्थामा खुन्मिङ हुँदै विमानबाट काठमाडौं आएका थिए।

वुहानमा रहेका नेपालीहरू नयाँ भाइरसबाट सङ्क्रमित नभएकाले नेपालमा कोही पनि डराउनु पर्ने अवस्था नआएको उनले बताएको बीबीसीले उल्लेख गरेको छ। शुक्रराज सरुवारोग अस्पतालले यसअघि नै नेपालमा फेला परेका संक्रमित ठिक भएर घर फर्किसकेको जनाएको थियो।
े
उनको उपचारमा संलग्न चिकित्सकका अनुसार उनलाई सामान्य औषधिका अतिरिक्त अलि फराकिलो दायराको हुने ब्रोड स्पेक्ट्रमको एन्टिबायोटिक औषधि दिइएको बीबीसीले जनाएको छ।
बीबीसीले संक्रमितसँग कुरा गरेको छ। बीबीसीसँग ती व्यक्तीले आफ्नो अनुभव शेयर गरेका छन्।

‍‍‍====
म चीनको वुहान शहरमा अध्ययन गर्छु। जनवरी र फेब्रुअरीमा विश्वविद्यालयमा जाडोको छुट्टी हुने भएकोले म जनवरी ९ तारिखमा वुहानबाट खुन्मिङ हुँदै नेपाल आएँ।

मलाई वुहानमा नै रुघाखोकी लागिरहेको थियो। त्यहाँ भाइरसको नयाँ सङ्क्रमण सुरु भइसकेको पनि मलाई थाहा भइसकेको थियो।

त्यसैले शङ्का लागेर जनवरी १३ तारिखमा म काठमाडौंको टेकु अस्पताल गएँ जहाँ मलाई अलिकति ज्वरो आएको थाहा भयो।

म वुहानबाट आएको थाहा पाएपछि चिकित्सकले मलाई निरीक्षणमा राखेर उपचार गर्नु पर्ने सल्लाह दिनु भयो।

त्यसपछि टेकु अस्पतालमैँ राखेर मेरो उपचार सुरु गरियो। डाक्टरहरूले मलाई औषधिहरू दिनु भयो र राम्रो हेरचाह गर्नु भयो।

मलाई सुईबाट एन्टिबायोटिक औषधि पनि दिइयो। दुई दिनपछि नै मलाई आराम भइहाल्यो।

कोरोनाभाइरस सङ्क्रमणको आशङ्कापछि मेरो खकारको नमुना जाँचको लागि हङकङ पठाइएको थियो। तर म ठिक भएर अस्पतालबाट घर फर्किएँ।

पछि हङकङबाट मेरो रगतको नमुना परीक्षणको नतिजा आएछ। कोरोनाभाइरस सङ्क्रमण भएको पुष्टि भएछ।

डाक्टरले फोन गरेर मलाई भिडभाडबाट टाढै बस्नु र आफ्नो राम्रो हेरचाह गर्नु भन्नु भयो। त्यसपछि म केही डराएँ।

केही दिनपछि जनवरी २७ तारिखमा काठमाडौंमै फेरि मेरो रगतको नमुना परीक्षण गरियो। त्यतिबेला म कोरोनाभाइरस सङ्क्रमणमुक्त भइसकेको पुष्टि भयो।

तैपनि म सावधान रहिरहेँ। चिकित्सकहरूसँगको सम्पर्कमा रहिरहेँ।

त्यसको दुई दिनपछि जनवरी ३१ तारिखमा फेरि मेरो रगत जाँच गरियो। म कोरोनाभाइरसको सङ्क्रमणमुक्त भएको फेरि पुष्टि भयो।

त्यसपछि म आफ्नो घर र काठमाडौं आउजाउ गरिरहेको छु। आफ्नो स्वास्थ्यप्रति सजग छु र आफ्नो राम्रो हेरचाह गरिरहेको छु।

अहिले एक महिना बितिसकेको छ। म पूर्ण रूपमा स्वस्थ भइसकेको छु। मलाई कुनै स्वास्थ्य समस्या छैन।

वुहानको मेरो विश्वविद्यालयमा बिदा भएकोले म नेपालमै आफ्नो अध्ययनमा जुटिसकेको छु।

मेरो घर परिवारका सदस्यलाई मलाई कोरोनाभाइरस सङ्क्रमण भएको र पछि ठिक भएको थाहा छ। मलाई सबैले माया गर्नुहुन्छ। कसैले कुनै भेदभाव गर्नुहुँदैन।

मैले कोरोनाभाइरसबारेका खबरहरू पढिरहेको छु। अहिले चीनको हुबे प्रान्त र त्यहाँको वुहान शहरमा नेपाल फर्किने प्रतीक्षा गरिरहेका नेपालीहरूमा अहिलेसम्म कसैलाई पनि कोरोनाभाइरस सङ्क्रमण भएको मलाई थाहा छैन।

म पनि त्यहाँ रहेका मेरा साथीहरूसँग निरन्तर सम्पर्कमा छु। उहाँहरू स्वस्थ रहेको बताउनुभएको छ।

उहाँहरूलाई नेपालमा अलग्गै जहाँसुकै राख्दा पनि स्थानीयस्तरमा कुनै समस्या हुँदैन। आत्तिनुपर्ने अवस्था छैन।

सबैजनाले ९छिउँ गर्दा मुख छोप्ने, साबुनले हात धोइराख्ने जस्ता० आफ्नो व्यक्तिगत सरसफाइमा ध्यान दिन चाहिँ जरुरी छ।

मेरो विचारमा चीनको चिसो मौसमका कारण त्यहाँ नयाँ भाइरसको सङ्क्रमण फैलिइरहेको छ र त्यो नियन्त्रण हुन केही समय लागिरहेको छ।

म नेपाल आउने बित्तिकै यहाँको तुलनात्मक रूपमा न्यानो मौसम पनि मेरो लागि अनुकूल बनेको हुन सक्छ। उपचार सुरु गरेको दुई तीन दिनमै मलाई ठिक भयो र म अहिले यसरी स्वस्थ भएर आफ्नो काममा फर्किन सफल भएको छु।

मेरो विचारमा चिसो हट्ने क्रम सुरु भएसँगै चीनमा पनि कोरोनाभाइरसको सङ्क्रमणको क्रम कम हुन थाल्छ र सबै कुरा बिस्तारै सामान्य हुन थाल्नेछ।

त्यसपछि म फेरि चीनको वुहान फर्किएर आफ्नो अध्ययनमा जुट्ने वातावरण बन्नेछ। बीबीसी नेपालीबाट साभार र सहयोग