क्यानबेरा। अस्ट्रेलियामा ८ जना नेपाली विद्यार्थीलाई कोरोनाभाइरस संक्रमण भएको अस्ट्रेलियाली अधिकारीलाई उद्धृत गर्दै क्यानबेरास्थित नेपाली दूतावाले जनाएको छ । दूतावासका अनुसार अस्ट्रेलियाको न्यूसाउथ वेल्समा ४, भिक्टोरियामा ३ र तस्मानियामा १ जना नेपाली विद्यार्थी संक्रमित भएका हुन् । तस्मानियाका संक्रमित विद्यार्थी भने अहिले उपचारपछि पूर्ण रुपमा स्वस्थ भएर घर फर्किइसकेको दूतावासले जनाएको छ ।

दूतावासले उपचारको क्रममा रहेका अन्य सातैजना विद्यार्थीहरुको स्वास्थ्यमा पनि उल्लेख्य सुधार हुँदै गएको र आफ्नै घरमा क्वारेन्टाइरमा रहेको जनाएको छ । दूतावासले अस्ट्रेलियामा रहेका नेपाली विद्यार्थी, अस्थायी बासिन्दा र नेपाली समुदायमा कोभिड १९ को संक्रमण फैलिन नदिन र संक्रमितलाई स्वास्थ्य उपचारको उचित व्यवस्था मिलाउन अस्ट्रेलियाको सम्बनिधत निकायसँग समन्वय गरिरहेको पनि जनाएको छ ।