काठमाडौं। १ वर्षभन्दा लामो समयपछि नेपाली क्रिकेट मैदानमा अन्तर्राष्ट्रिय क्रिकेटको पुनरागमन भएको छ । आज नेपाल र नेदरल्याण्डबीच हुने पहिलो टि–२० खेल हेर्नको लागि किर्तिपुर मैदानमा दर्शकहरुको भिड जम्मा भएको छ । लामो समयपछि स्वदेशमा अन्तर्राष्ट्रिय क्रिकेट हेर्न फ्यानहरु उत्साहित भएका छन् ।

नेपाल, नेदरल्याण्ड र मलेसियाबीच हुने यो त्रिदेशीय सिरिजमा कूल ७ अन्तर्राष्ट्रिय टि–२० हुनेछन् । उद्घाटन खेल आज नेपाल र नेदरल्याण्डबीच हुँदैछ । अब भोलि मलेसिया र नेदरल्याण्ड, सोमबार नेपाल र मलेसिया, मंगलबार नेपाल र नेदरल्याण्ड, बुधबार मलेसिया र नेदरल्याण्ड तथा बिहीबार नेपाल र मलेसियाबीच खेल हुनेछ । शुक्रबार एक दिन खेल हुने छैन र अर्को शनिबार तालिकामा शीर्ष स्थानमा रहने २ टिमबीच फाइनल खेल हुनेछ ।