काठमाडौं । दक्षिण अफ्रिकाका अफ स्पिनर साइमन हार्मरले केपटाउन टेस्टमा स्मरणीय प्रदर्शन गरेका छन्। ३७ वर्षीय हार्मरले अस्ट्रेलियाविरुद्धको खेलमा कुल १० विकेट लिँदै दक्षिण अफ्रिकालाई १७६ रनले जिताए। यस जितसँगै दक्षिण अफ्रिकी टोलीले सिरिज पनि २-१ ले आफ्नो नाम गरेको छ।

खेलपछि साइमन हार्मरलाई आफ्नो युवा अवस्थाको बारेमा कुनै सन्देश दिन आग्रह गरिँदा उनी भावुक भए र उनका आँखाहरू रसाए। आफ्नो सङ्घर्षपूर्ण यात्रालाई सम्झँदै उनले आफ्नो करियरमा कुनै पनि कुरा परिवर्तन गर्न नचाहने बताए। केही बेरसम्म रोकिएपछि उनले आफ्ना अनुभवहरूले नै आफूलाई आजको यो मान्छे बनाएको बताएका छन्।

साइमन हार्मर सन् २०१५ मा भारत भ्रमणपछि दक्षिण अफ्रिकी टेस्ट टोलीबाट बाहिरिएका थिए। त्यसपछि उनले इङ्गल्यान्डमा एसेक्सका लागि काउन्टी क्रिकेट खेले र कैयौँ वर्षसम्म अन्तर्राष्ट्रिय क्रिकेटबाट टाढा रहे।

यस अवधिमा उनले आफ्नो खेललाई निखारे र काउन्टी क्रिकेटका सफल स्पिनरहरूमा आफ्नो पहिचान बनाए। सन् २०२२ मा दक्षिण अफ्रिकी टोलीमा उनको पुनरागमन भयो र उनले टेस्ट क्रिकेटमा फेरि एकपटक आफ्नो क्षमता साबित गर्ने अवसर पाए।

निर्णायक टेस्टको अन्तिम दिन अस्ट्रेलियालाई जितका लागि २८८ रन आवश्यक थियो भने दक्षिण अफ्रिकालाई १० विकेटको खाँचो थियो। कागिसो रबाडाले सुरुआती ओभरमै दुई विकेट लिँदै टोलीलाई शानदार सुरुआत दिलाए।

त्यसपछि साइमन हार्मरले अस्ट्रेलियाली ब्याटरहरूलाई सम्हालिने कुनै मौका दिएनन्। उनले दोस्रो इनिङ्समा करियरकै उत्कृष्ट बलिङ गर्दै ६/१६ को प्रदर्शन गरे र अस्ट्रेलियालाई १११ रनमै समेटिदिए। यस खेलमा उनको कुल प्रदर्शन १०/१२० रह्यो र उनलाई ‘प्लेयर अफ द म्याच’ घोषित गरियो।

साइमन हार्मरले केपटाउनमा आफ्नो प्रयास केवल सही स्थानमा निरन्तर बलिङ गर्ने मात्र रहेको बताए। टर्न लिइरहेको पि्चमा उनले गति, फ्लाइट र एङ्गलमा परिवर्तन गर्दै अस्ट्रेलियाली ब्याटरहरूलाई कडा दबाबमा राखे।

पहिलो टेस्टमा २१४ रनको पराजय भोगेको दक्षिण अफ्रिकाले त्यसपछि शानदार पुनरागमन गर्‍यो। टोलीले सिरिजको दोस्रो टेस्ट एक पारी र ३१ रनले जित्यो भने केपटाउनमा उत्कृष्ट जित निकाल्दै टेस्ट सिरिज २-१ ले जितेर आईसीसी टेस्ट वरियतामा नम्बर-१ स्थान हासिल गर्‍यो।