मरिसकेकी मोडलको अन्तिम संस्कारपछि अस्तु चोरेर त्यसैसँग बिहे
काठमाडौं। चीनकी प्रसिद्ध सामाजिक संजाल इन्फ्लुएन्सर तथा मोडल लुओ शाओ माओ माओ जीले गत महिना लाइभ भिडियो स्ट्रिमिङका क्रममा किटनाशक पिएर आत्महत्या गरेकी थिइन् । उनी आफ्नो सुन्दरताका लागि प्रसिद्ध थिइन् । टिकटकजस्तै सामाजिक संजाल डाउयिनमा उनका ६ लाखभन्दा धेरै फलोअर थिए । मृत्यु भएको एक महिनापछि लुओ एक पटक फेरि चर्चामा आएकी छिन् । उनी चर्चामा आउनुको कारण निकै अनौठो छ ।
ग्लोबल टाइम्सका अनुसार लुओको मृत्युपछि केही पुरुषहरु उनीसँग भुताहा विवाह गर्न चाहन्थे । यसका लागि ती पुरुषहरुलाई लुओको अन्तिम संस्कारपछि उनको अस्तु चाहिएको थियो । यस्तोमा अन्तिम संस्कार गर्ने कर्मचारीहरुले लुओको अस्तु ती पुरुषहरुलाई बेच्ने योजना बनाए जो उनको अस्तुसँग भुताहा विवाह गर्न चाहन्थे । कर्मचारीहरुले लुओको अस्तु चोरी गरे र अन्य २ जनासँग मिलेर त्यसलाई बेच्ने प्रयास गरे । तर, बिक्री गर्नुभन्दा पहिल्यै उनीहरुलाई पक्राउ गरियो ।
रिपोर्टअनुसार चीनका केही भागमा अहिले पनि भुताहा विवाहको परम्परा छ । यो परम्परा करिब ३ हजार वर्ष पुरानो हो । यसमा मानिसहरु मरिसकेका व्यक्तिसँग विवाह गर्न प्रयास गर्छन् । उनीहरुमा दिवंगत आत्माले पनि आफ्नो सन्तानको खुसीको लागि विवाह गर्नुपर्छ भन्ने मान्यता हुन्छ । आम रुपमा यो परम्परा मृतकका मातापिताले पूरा गर्छन् । चीनमा दशकौंदेखि यो प्रथामाथि प्रतिबन्ध लगाइएको छ । तर, पछिल्लो केही समययता यो प्रथालाई मान्नेहरुको संख्यामा वृद्धि भएको छ ।
Facebook Comment