काठमाडौं। अमेरिकाको टेक्सस राज्यको ड्यालसमा यहुदी पुजास्थलमा चार जना मानिसहरुलाई बन्धक बनाउने व्यक्तिको अमेरिकाको संघीय जाँच ब्युरो (एफबीआइ)को कारवाहीमा मृत्यु भएको छ । एफबीआइले यी व्यक्ति ४४ वर्षका बेलायती नागरिक मलिक फैसल अकरम भएको बताएको छ ।

शनिबार कोलिभिलेमा बिहानको प्रार्थनाको समयमा यी व्यक्तिले मानिसहरुलाई बनधक बनाएका थिए । त्यसपछि पुलिससँग चलेको १० घण्टा लामो मुठभेडमा यी व्यक्तिको गोली लागेर मृत्यु भयो । सबै बन्धकहरुलाई सुरक्षित छुटाइएको छ । अमेरिकी राष्ट्रपति जो बाइडेनले यसलाई आतंकी कृत्य भनेका छन् । बेलायतले पनि आक्रमणको निन्दा गरेको छ ।

बेलायतका विदेश मन्त्री लिज ट्रसले यसलाई आतंकवाद र यहुदी विरोधीसँग जोड्दै भने ‘हामी घृणा फैलाउनेहरुविरुद्ध आफ्ना नागरिकको अधिकार र स्वतन्त्रता रक्षामा अमेरिकाको साथमा छौं । ड्यालस एफबीआइका अनुसार यो षड्यन्त्रमा अकरम बाहेक अरुको संलग्नता देखिएको छैन । अकरमका भाइ मलिक फैसलले माफी माग्दै एक बयान जारी गरेका छन् जसमा उनले अकरम मानसिक रुपले पीडित भएको बताएका छन् ।