काठमाडौं । भारतको २९औं प्रधानसेनापति मनोज पाण्डेले पदभार ग्रहण गरेका छन् । पदभार ग्रहण गरेपछि सेना प्रमुखले पूर्वी लद्दाखको लाइन अफ एक्चुअल कन्ट्रोल (एलएसी) मा यथास्थिति परिवर्तन गर्ने चिनियाँ प्रयासलाई भारतीय सेनाले पर्याप्त जवाफ दिएको बताएका छन् ।

यससँगै उनले भारतले आफ्नो भूमिमा कसैलाई पनि हस्तक्षेप गर्न नदिने स्पष्ट पारेका छन् । समाचार एजेन्सी एएनआईलाई अन्तर्वार्ता दिँदै जनरल मनोज पाण्डेले एलएसीको अवस्था अहिले सामान्य रहेको बताएका छन् ।

“हाम्रो विरोधीले यथास्थितिलाई बलपूर्वक परिवर्तन गर्न एकपक्षीय र उत्तेजक कारबाही गरेको थियो जसको मलाई पर्याप्त प्रतिक्रिया दिइएको छ,” उनले भने।

सेना प्रमुखले विगत दुई वर्षमा सेनाले खतराको मूल्याङ्कन गरी सेनालाई पुनर्गठन गरेको बताए । “जहाँसम्म एलएसीमा स्थितिको सवाल छ, हाम्रा सिपाहीहरू यथास्थितिमा कुनै परिवर्तन नहोस् भनेर सुनिश्चित गर्न दृढताका साथ त्यहाँ छन्,” उनले भने।

जनरल मनोज पाण्डे भन्छन्, ‘सेनाको ध्यान पूर्वाधार विकासमा केन्द्रित छ, विशेषगरी परिचालन र लजिस्टिक आवश्यकतामा ।’ पूर्वी लद्दाखमा भारत र चीनका सैनिकहरूबीच हिंसात्मक झडप भएको छ । त्यसयता दुवै देशका सेनाबीच पटक–पटक वार्ता भइसकेको छ ।