काठमाडौं । नाजी नेता हिटलरको नशामा यहुदीहरूको रगत बगेको भन्ने रुसी विदेशमन्त्री सर्गेई लाभरोभको भनाइप्रति इजरायलले कडा आपत्ति प्रकट गरेको छ । इजरायलले रुसलाई आफ्ना विदेशमन्त्रीको भनाइप्रति माफी माग्न पनि आग्रह गरेको छ ।

इजरायलका विदेशमन्त्री यायर लापिडले रुसी राजदूतलाई सर्गेई लाभरोभको भनाइप्रति कडा आलोचना गर्न बोलाइने बताएका छन्। सर्गेई लाभरोभले आइतबार एक इटालियन टेलिभिजन च्यानललाई दिएको अन्तर्वार्तामा यो विवादास्पद टिप्पणी गरेका हुन् ।

फेब्रुअरी २४ मा युक्रेनमा रुसको आक्रमणपछि इजरायलले दुई पक्षबीच नाजुक सन्तुलन कायम राख्ने प्रयास गरेको भएपनि सर्गेई लाभरोभको भनाइपछि इजरायलमा आक्रोशको वातावरण छ ।

ल्यापिडले यनेट न्यूज वेबसाइटसँगको कुराकानीमा यसबारे प्रतिक्रिया दिँदै भने, “यो एक अपमानजनक, अक्षम्य, ऐतिहासिक गल्ती हो र हामी आशा गर्दछौं कि उनीहरूले यसका लागि माफी माग्नेछन्।”

यायर लापिडले भने, “यहूदीहरूले होलोकास्टमा आफ्नो ज्यान आफैं लिएका थिएनन्। यहूदीहरू विरुद्धको जातीयवादको सबैभन्दा खराब स्तर भनेको यहूदीहरूको विरोधको लागि उनीहरूलाई नै दोष दिनु हो।”

इजरायलमा रहेको रुसी दूतावासले यायर लापिडको भनाइमा अहिलेसम्म कुनै प्रतिक्रिया दिएको छैन। आक्रमणका सम्बन्धमा रुसले युक्रेनलाई निशस्त्रीकरण गर्न र नाजीहरूको प्रभावबाट मुक्त गर्न चाहेको बताउँदै आएको छ ।

इटालियन टेलिभिजन च्यानल रेटे ४ सँगको कुराकानीमा, सर्गेई लाभरोभलाई प्रश्न सोधिएको थियो कि रसियाले कसरी युक्रेनलाई यहूदी प्रभावबाट मुक्त गर्न आवश्यक छ भनी दाबी गर्न सक्छ जब यसका राष्ट्रपति भोलोडिमिर जेलेस्की आफै यहूदी छन्।

समाचार एजेन्सी रोयटर्सको रिपोर्टका अनुसार सर्गेई लाभरोभले इटालियन अनुवादकको सहयोगमा यस प्रश्नको जवाफमा भने, “यो कस्तो नाजीवाद हो जब उनीहरू भन्छन् यदि हामी यहूदी हौं भने, मलाई लाग्छ कि हिटलर पनि यहूदी मूलका हुन्। यदि त्यसो हो भने, यो तर्कको कुनै अर्थ छैन।”

उनले जारी राखे, “धेरै समयदेखि हामीले सुन्दै आएका छौं कि समझदार यहूदी मानिसहरूले यहूदीहरूका सबैभन्दा ठूलो विरोधीहरू यहूदीहरू नै हुन् भनेर भन्छन्।”

समाचार एजेन्सी एएफपीका अनुसार आइतबार इटालियन न्युज आउटलेट मिडियासेटलाई दिएको अन्तर्वार्तामा लाभरोभले युक्रेनी राष्ट्रपति भोलोडिमिर जेलेस्कीले आफू यहूदी भएमा त्यहाँ कस्तो नाजीवाद आउन सक्छ भन्ने तर्क गरिरहेका छन् भनेर प्रश्न गरेका छन् ।

लाभरोभको अन्तर्वार्ताको ट्रान्सक्रिप्ट रुसी विदेश मन्त्रालयको वेबसाइटमा पोष्ट गरिएको छ, जसमा उनलाई उद्धृत गरिएको छ, “म गलत हुन सक्छु, तर हिटलरको नसामा पनि यहूदी रगत थियो।”

होलोकास्टमा मारिएका ६० लाख यहूदीहरूको सम्झनामा निर्माण गरिएको इजरायली स्मारक याद वासेमका अध्यक्ष ड्यानी दयानले सर्गेई लाभरोभको भनाइलाई नाजीहरूबाट मारिएकाहरूको अपमान भनेका छन्।

इजरायलको कान्स रेडियोसँगको कुराकानीमा ड्यानी दयानले भने – सर्गेई लाभरोभले यहूदीहरू विरुद्ध षड्यन्त्रका सिद्धान्तहरू फैलाइरहेका छन्, जसको कुनै आधार छैन। उनले सर्गेई लाभरोभको भनाइको निन्दा गर्नुपर्ने बताए ।

यस मार्चको अन्त्यमा, राष्ट्रपति जेलेस्कीले इजरायली संसदमा एक भाषण दिए जसमा उनले इजरायललाई रुसको आक्रमणको बिरूद्ध युक्रेनलाई समर्थन गरेर “विकल्प छनोट” गर्न अपील गरे।

युक्रेनले पनि इजरायलसँग हतियार मागेको थियो । इजरायली अधिकारीहरूले युक्रेनी राहत कार्यकर्ताहरूलाई हेलमेट र बुलेटप्रुफ ज्याकेटहरू पठाइए पनि हालैका दिनहरूमा कुनै हतियार प्रदान नगरिएको बताए।