काठमाडौं । पाकिस्तानका पूर्वप्रधानमन्त्री इमरान खानको हत्या हुनसक्ने हल्लाको बीचमा अर्को खुलासा भएको छ । इमरानको निजी निवास ‘बनी गाला’का एक कर्मचारीले उनको जासुसी गर्ने प्रयास गरेका थिए ।

कर्मचारीले इमरानको सुत्ने कोठामा गोप्य क्यामेरा जडान गरिरहेका थिए । हाल पूर्वप्रधानमन्त्रीको सुरक्षामा खटिएका कर्मचारीले आरोपित कर्मचारीलाई हिरासतमा लिएका छन् । उनले कसको आदेशमा गोप्य क्यामेरा जडान गरेको भन्ने विषयमा सोधपुछ गरी जानकारी संकलन भइरहेको छ ।

स्रोतलाई उद्धृत गर्दै पाकिस्तानको स्थानीय सञ्चारमाध्यमले बानी गालाका एक कर्मचारीलाई पूर्व प्रधानमन्त्रीको सुत्ने कोठामा इन्टेलिजेन्स क्यामेरा जडान गर्ने प्रयास गरेको आरोपमा पक्राउ गरिएको बताएको छ । इन्टेलिजेन्स क्यामेरा जडान गर्ने क्रममा अर्का कर्मचारीले देखेपछि सुरक्षा टोलीलाई खबर गरेको बताइएको छ ।

पाकिस्तान तहरीक-ए-इन्साफ (पीटीआई) का धेरै व्यक्तिहरूले इमरान खानको ज्यान खतरामा रहेको दाबी गरिरहेका छन्। पीटीआई नेता शाहबाज गिलले भने कि यस सम्बन्धमा हामीले सरकार सहित सबै सम्बन्धित निकायलाई जानकारी गराएका छौं। मिडियासँग कुरा गर्दै शाहबाज गिलले इन्टेलिजेन्स क्यामेरा जडान गर्दा पक्राउ परेका कर्मचारीले इमरान खानको बेडरूम सफा गर्ने दाबी गरेका छन् ।

उनले भनेका छन्, ‘हाम्रा धेरै मानिसहरूलाई इमरान खानको बारेमा जानकारी लिन धम्की दिइँदैछ। उनले यस्तो लाजमर्दो प्रयासबाट जोगिनु पर्ने बताए । पक्राउ परेका कर्मचारीले धेरै खुलासा गरेको पीटीआई नेताले बताए । हाल, उनले यो जानकारी साझा गर्न अस्वीकार गरेका छन्।

अर्कोतर्फ गृहमन्त्री राणा सनाउल्लाहले यसअघि २३ जुनमा इमरान खानलाई मार्ने धम्की दिएको दाबीलाई खारेज गरेका थिए । सञ्चारमाध्यमसँगको कुराकानीमा मन्त्री सनाउल्लाहले इमरान खान प्रधानमन्त्री हुँदा र त्यतिबेला जुन सुरक्षा पाएका थिए, अहिले पनि त्यही सुरक्षा दिइएको बताए ।

यसअघि इमरान खानका भतिजा हसन नियाजीले पाकिस्तान तहरीक–ए–इन्साफ (पीटीआई) प्रमुखलाई केही भयो भने त्यसलाई पाकिस्तानमाथि आक्रमण मानिने बताएका थिए । नियाजीले यस्तो भयो भने नराम्रो परिणाम भोग्नुपर्ने बताएका थिए । पाकिस्तान तहरीक–ए–इन्साफका नेता फैसल वाव्दाले पनि पाकिस्तानका पूर्वप्रधानमन्त्रीको हत्या गर्ने षड्यन्त्र भएको दाबी गरेका थिए ।