काठमाडौं। नेपाली कांग्रेसका केन्द्रिय सदस्य एंव प्रतिनिधिसभा सदस्य विनोद चौधरीले आसन्न संघीय निर्वाचनमा प्रत्यक्षतर्फ निर्वाचन लड्ने घोषणा गरिसकेका छन्। जनताबाट अनुमोदन भएर जनप्रतिनिधि बन्ने आफ्नो चाहना रहेको सार्वजनिक गरेपछि कांग्रेस नेता चौधरीलाई विभिन्न जिल्लाबाट मतदाताले आफ्नो निर्वाचन क्षेत्रबाट चुनावमा उठ्न् सार्वजनिक रुपमा आग्रह गर्न थालेका हुन्।

नेपालका एक मात्र डलर अर्बपति चौधरीले बाँकी जीवन पूर्णकालीन राजनीतिमा बिताउने बताइसकेका छन्। मंसिर दोस्रो साताभित्रै संघीय निर्वाचन गर्ने गरी सरकारले तयारी अगाडि बढाइसकेको छ। नवलपुर–२ बाट चुनाव लड्ने उनको तयारी छ। तर, पार्टीको निर्णयअनुसार आफू जुनसुकै निर्वाचन क्षेत्रबाट चुनाव लड्न तयार रहेको चौधरीले बताएपछि उनलाई विभिन्न जिल्लाबाट मतदाताले आफ्नो निर्वाचन क्षेत्रमा चुनाव लड्नका लागि प्रस्ताव गरेका हुन्।

नेपाली कांग्रेस ललितपुर क्षेत्र नं ३ का क्षेत्रीय सभापति महेश्वर थापाले ललितपुर क्षेत्र न ३ बाट चुनाव लड्न प्रस्ताव गरेका छन्। उनले सामजक सञ्जाल फेसबुकमा लेखे, ‘ललितपुर क्षेत्र नं ३ मा स्वागत गर्न तयार छु।’ ललितपुर–३ बाट हालकी उर्जामन्त्री एवं नेकपा माओवादी केन्द्रकी नेतृ पम्फा भुसाल निर्वाचित भएकी हुन्।

त्यस्तै, महोत्तरी जिल्लाको गौशाला उद्योग वाणिज्य संघका अध्यक्ष रामराजाप्रसाद साहले नेता चौधरीलाई महोत्तरी क्षेत्र नं. १ बाट चुनाव लड्न आग्रह गरेका छन्। कांग्रेसका स्थानीय नेतासमेत रहेका साहले भनेका छन्, ‘नेपाली कांग्रेसकोतर्फबाट महोत्तरी क्षेत्र नं. १ बाट निर्वाचन लड्न हार्दिक अनुरोध गर्दछु ’, यो क्षेत्रबाट नेकपा माओवादी केन्द्रका नेता गिरिराजमणी पोखरेल निर्वाचित भएका हुन्।

बाँकेका शरद रेग्मीले बाँके–३ बाट चुनाव लड्न आग्रह गरेका छन् भने खिमराज ओलीले रुकुम पश्चिमबाट चुनाव लड्न चौधरीलाई आग्रह गरेका छन्। त्यस्तै, उनलाई सिन्धुपाल्चोक–२ बाट चुनाव लड्न स्थानीयले आह्वान गरेका छन्।

फेसबुकमा स्थानीय सरोज न्यौपाने, सागर नेपाल, दिनेश गजुरेल, पुर्णेश तामाङ, सुमन सिंहलगायतले सिन्धुपाल्चोक–२ बाट चुनाव लड्न आग्रह गरेका छन्। सिन्धुपाल्चोक–२ बाट नेकपा एमालेका नेता शेरबहादुर तामाङ निर्वाचित भएका हुन्। कांग्रेसले यस निर्वाचन क्षेत्रमा राप्रपाका नेता पशुपति शम्शेर जबरालाई समर्थन गरेको थियो।

धादिङका गिरिराज कडुवालले धादिङ–२ बाट निर्वाचन लड्न आग्रह गर्दै लेखेका छन्, ‘धादिङमा हामी स्वागत गर्छौं । हामी जिताउँछौं पनि।’

फेसबुकमा कतिपयले एमाले अध्यक्ष केपी शर्मा ओलीको निर्वाचन क्षेत्र झापा–५ बाट चुनाव लड्न आग्रह गरेका छन् । केहीले नेकपा माओवादी केन्द्रका अध्यक्ष पुष्पकमल दाहाल प्रचण्डको निर्वाचन क्षेत्रबाट प्रत्यक्ष चुनाव लड्न भनेका छन् । रामेश्वर पुडासैनीले काठमाडौं–३ बाट चुनाव लड्न चौधरीलाई भनेका छन् भने वीरबहादुर केसीले राम्रा मान्छेले जहाँबाट पनि चुनाव जित्ने भन्दै चौधरीले आउने निर्वाचन सजिलै जित्ने दावी गरेका छन्। उनले भने, ‘तपाईजस्ता राम्रा मान्छे जहाँबाट लड्दा पनि जित्नुहुन्छ।’

पाल्पा, भोजपुर, म्याग्दी, दोलखा, सुनसरी, रुपन्देहीलगायतका जिल्लाबाट चुनाव लड्न पनि आग्रह गरिएको छ। नवलपुरका दुबै क्षेत्रबाट चुनाव लड्न सुझाव दिने स्थानीयको संख्या पनि उल्लेख्य छ।

पछिल्लो समय फरक विधामा आफुलाई प्रमाणित गरेका सफल व्यत्तित्वहरु नागरिकको आकर्षणमा परेका छन्। चौधरी पनि भारतबाहेक दक्षिण एसियाका एक्ला फोर्ब्सको डलर अर्बपतिको सूचीमा सुचिकृत सफल उद्यमी हुन्।

कांग्रेसको १४र्आँ महाधिवेशनमा उनी खुला प्रतिस्पर्धाबाट केन्द्रीय सदस्यमा विजयी भएका हुन्। उनी महाधिवेशनअन्तर्गत वडातहबाटै प्रतिस्पर्धा गरेर आएका थिए।

नेता चौधरी स्थानीय तह निर्वाचनमा नवलपुरका सबै स्थानीय तहमा चुनावी प्रचारप्रसारमा खटिएका थिए। उनले आफ्नो जीवनको बाँकी समय नेपाली कांग्रेसमार्फत राजनीतिमा बिताउने घोषणासमेत गरिसकेका छन्। आफ्नो तीन दशक लामो व्यवसायिक अनुभव राजनीतिमार्फत् देशको समृद्धिका लागि खर्च गर्न चाहेका चौधरीले बताए।