काठमाडौं । अफगानिस्तानमा विद्यालय शिक्षापछि अब छोरीहरूको उच्च शिक्षामा पनि प्रतिबन्ध लगाइएको छ । अफगानिस्तानको उच्च शिक्षा मन्त्रीको पत्र अनुसार तालिबानले देशका विश्वविद्यालयहरूमा छात्राहरूको शिक्षामा प्रतिबन्ध लगाउने घोषणा गरेको छ।

यो आदेश अर्को सूचना नआएसम्म कायम रहने उच्च शिक्षा मन्त्रीले बताए । यसलाई जतिसक्दो चाँडो कार्यान्वयन गरिनेछ। अफगानिस्तानमा यसअघि नै महिलालाई विद्यालय जान प्रतिबन्ध लगाइएको थियो । अहिले उनीहरुको उच्च शिक्षाको पहुँच पनि बन्द भएको छ ।

काबुल युनिभर्सिटीकी एक छात्राले यो खबर सुनेदेखि लगातार रोइरहेकी बताइन् । तीन महिनाअघि अफगानिस्तानका बालिका र महिलाहरूले विश्वविद्यालयको प्रवेश परीक्षा दिएका थिए।

तर, छात्राहरूले अध्ययन गर्न सक्ने विषयहरूमा व्यापक प्रतिबन्धहरू राखिएको थियो। पशु चिकित्सा विज्ञान, इन्जिनियरिङ, अर्थशास्त्र र पत्रकारिता जस्ता विषयहरूमा कडा प्रतिबन्ध थियो।

गत वर्ष, अफगानिस्तानमा तालिबान शासन पछि, विश्वविद्यालयहरूमा पुरुष र महिला विद्यार्थीहरूका लागि छुट्टाछुट्टै प्रवेश र अध्ययनको लागि छुट्टै कोठाहरू सुरु गरिएको थियो।

महिला वा वृद्ध प्राध्यापकहरूले मात्र छात्राहरूलाई पढाउन सक्थे। यस प्रतिबन्धको बारेमा एक विश्वविद्यालयकी विद्यार्थीले बीबीसीलाई बताइन् कि उनलाई लाग्छ तालिबान महिला र उनीहरूको शक्तिसँग डराउँछन्।

विद्यार्थीले भनिन्, “उनीहरूले मलाई भविष्यसँग जोड्ने एकमात्र बाटो काटेका छन्।”

तालिवानको यो आदेशको अमेरिकाले विरोध गरेको छ । अफगानिस्तानका लागि विशेष अमेरिकी राजदूत रिना अमिरीले ट्वीट गरिन्, “तालिबानले छोरीहरू र महिलाहरूलाई स्कूल र विश्वविद्यालय शिक्षा अस्वीकार गरेपछि र उनीहरूलाई लक्षित गरी १६ भन्दा बढी आदेश जारी गरेपछि, तालिबानहरू ९० को दशकका चरमपन्थी हुन् भन्ने कुरामा कुनै शंका छैन। तिनीहरूले अफगानिस्तानको ५० प्रतिशत जनसंख्या र स्थिरताको आशालाई ध्वस्त पारिरहेका छन्।”