काठमाडौं । २१ वर्षअघि आफ्ना तीन छोराछोरीको अगाडि आमाको हत्या गरी बेलायतबाट भागेर पाकिस्तान गएका एक व्यक्तिलाई आजीवन जेल सजाय सुनाइएको छ । ६२ वर्षीय जफर इकबालले गत महिना आफ्नो अपराध स्वीकार गरेका थिए। जफर इकबालले कम्तिमा १९ वर्ष जेलमा बिताउनुपर्नेछ ।

लन्डनको ओल्ड बेलीमा, न्यायाधीश मुनरो केसीले सोमबार, १९ डिसेम्बरमा जफर इकबाललाई फैसला सुनाउँदै भने, ‘२१ वर्ष पहिले तपाईंले सम्बन्धविच्छेदको परिणाम भोग्नुको सट्टा आफ्नो ३८ वर्षीया श्रीमतीलाई मार्ने छनौट गर्नुभयो। जसका कारण तपाईंका सन्तान, जसलाई तपाईंले माया र संरक्षण गर्नु पर्ने थियो, तिनीहरूले दुःख भोगेका छन्।”

जफर इकबालका र उनकी मृतक पत्नी नाजियत जफरका दुवै छोराछोरीले अदालतमा बयान दिएका थिए, “हामी इज्जतको नाममा मारिने महिलाको संख्यामा हाम्रो आमाको नाम समावेश गर्न दिने छैनौं। हाम्रो आमाको कथा हामीसँग छ। उनले महिलाको आवाज दमनका विरुद्ध सधैँ अभियान चलाउनेछिन् ।”

जफर इकबालका दुई छोराछोरीले भने कि उनीहरूले २१ वर्षदेखि यो दिन पर्खिरहेका थिए र त्यस समयमा “ठूलो कठिनाइहरू” सामना गरेका थिए तर “आशा कहिल्यै छोडेनन्”।

उक्त बयानमा आफ्ना बुवालाई सम्बोधन गर्दै बालबालिकाले भनेका छन्, ‘हामीलाई छोडेर जाँदा हाम्रो के हुने हो भन्ने सोचेको पनि थिएन, तपाईले जे गर्नुभयो त्यो साँच्चै अक्षम्य छ ।

“हाम्री आमा साँच्चै एक महान महिला हुनुहुन्थ्यो । मायालु हृदयको साथ उहाँले हाम्रो लागि सबै गर्नुभयो र हामी यसलाई कहिल्यै बिर्सने छैनौं।”

जफर इकबालले आफ्नी श्रीमतीको हत्या गर्दा उनका चार सन्तान १५, १०, १० र ३ वर्षका थिए । अदालतलाई जफर इकबाल र उनकी श्रीमतीबीच सम्बन्धविच्छेदको प्रक्रिया चलिरहेको बताइएको थियो ।

जफर इकबाल बेलायतबाट भागेपछि, उनको विरुद्ध अन्तर्राष्ट्रिय गिरफ्तारी वारेन्ट जारी गरियो र पाकिस्तानी अधिकारीहरूलाई औपचारिक सुपुर्दगी अनुरोध गरियो।

त्यसपछि १६ वर्षपछि डिसेम्बर २०१७ मा अधिकारीहरूले जफर इकबाललाई ट्रेस गर्न सफल भए र उनलाई पक्राउ गरियो।

जफर इकबाललाई सेप्टेम्बर २०२१ मा उनको गिरफ्तार पछि बेलायतलाई सुम्पिएको थियो। नाजियत जफरको जन्म इङ्गल्याण्डमा भएको थियो र उनको विवाह पाकिस्तानमा जफर इकबालसँग १९८५ मा भएको थियो।