काठमाडौं । इजरायलको तेल अवीवस्थित बेन गुरियन अन्तर्राष्ट्रिय विमानस्थलमा एउटा यस्तो घटना सार्वजनिक भएको छ, जसले विमानस्थलका कर्मचारीलाई चकित बनाएको छ । वास्तवमा, एक दम्पतीले जानाजानी आफ्नो नवजात बच्चालाई एयरपोर्टमा छोडेका थिए।

दम्पतीले आफ्नो उडानको लागि ढिलो हुन थालेको भन्दै उनीहरूले आफ्नो बच्चालाई चेक-इन डेस्कमा छोडे। दम्पतीले यति सानो बच्चालाई पछाडि छोडेको घटना पहिलो पटक देखेको चेक इन डेस्कका कर्मचारीले बताएका छन् ।

सीएनएनको रिपोर्ट अनुसार, दम्पती आफ्नो बच्चाको साथ तेल अवीवबाट बेल्जियमको ब्रसेल्सका लागि रायनएयर एयरलाइन्सबाट उडान गर्दै थिए। जब उनीहरू रायनएयरको चेक इन डेस्कमा पुगे, उनीहरूले थाहा पाए कि उनीहरूले आफ्नो सानो बच्चाको लागि पनि टिकट किन्नु पर्छ।

यो कुरालाई लिएर दम्पतीले कर्मचारीसँग झगडा गर्न थाले। दुबैले आफ्नो बच्चाको लागि अतिरिक्त टिकट किन्न अस्वीकार गरे। यसैबीच, उडानको समय भयो, त्यसपछि श्रीमान्-श्रीमती दुवै बच्चालाई चेक इन डेस्कमा छोडेर उडानतर्फ दौडे।

एक रायनएयर कर्मचारीले स्थानीय मिडियालाई भने, ‘हामीले यस्तो कहिल्यै देखेका छैनौं। हाम्रो अगाडि के भइरहेको थियो, हामी पत्याउनै सकेनौं कि यस्तो सानो बच्चालाई आमाबाबुले कसरी छोड्न सक्छन्।

तर, विमानस्थलका कर्मचारीले दम्पतीलाई समातेर बच्चा लिएर जान भनेका थिए । घटनाको अनुसन्धान गर्न सुरक्षाकर्मी र प्रहरी बोलाइएको थियो ।

इजरायली एयरपोर्ट अथोरिटीले घटनाबारे एक विज्ञप्ति जारी गर्दै भनेको छ, ‘बेल्जियमको राहदानी लिएका एक जोडी आफ्नो नवजात बच्चालाई लिएर उडानका लागि टर्मिनल १ पुगेका थिए। उनको बच्चासँग टिकट थिएन। दम्पती ढिलो पुगेका थिए । त्यसपछि बच्चाको टिकट नलिई दम्पती उडानका लागि बोर्डिङ गेटतर्फ दौडे । दम्पतीले आफ्नो बच्चालाई काउन्टरमै छोडे।’

इजरायली प्रहरी प्रवक्ताले भने कि बच्चा पछि आमाबाबुसँग पुनर्मिलन भएकोले कुनै कारबाही गरिएको थिएन र अनुसन्धान रोकिएको थियो।

रायनएयरको वेबसाइटका अनुसार नवजात शिशुको लागि टिकट लिनुपर्नेछ, जसको शुल्क २७ डलर छ। यदि आमाबुवाले बच्चालाई काखमा लिएर उड्ने हो भने त्यति टिकट शुल्क तिर्नुपर्ने वेबसाइटमा उल्लेख छ । तर यदि आमाबाबुले बच्चालाई सीटमा यात्रा गराउ चाहन्छन् भने, तिनीहरूले यसको लागि अतिरिक्त शुल्क तिर्नुपर्नेछ।