काठमाडौं । के तपाईलाई संसारको सबैभन्दा शान्त ठाउँको बारेमा थाहा छ ? यो ठाउँ यति शान्त छ कि यहाँ कोही पनि लामो समय बस्न सक्दैनन् । यो ठाउँमा गएपछि मानिसले आफ्नै शरीरबाट विभिन्न किसिमका आवाज सुन्न थाल्छ ।

वास्तवमा यो एउटा कोठा हो जुन माइक्रोसफ्टले २०१५ मा तयार गरेको थियो। यसलाई गिनिज बुक अफ वर्ल्ड रेकर्डमा पनि समावेश गरिएको छ । यो कोठा रेडमन्ड, वाशिंगटनमा अवस्थित छ, जुन माइक्रोसफ्ट कम्पनीको एनेकोइक चेम्बर हो । एनेकोइक भनेको कुनै पनि प्रकारको प्रतिध्वनि वा गुञ्जन नहुनु हो।

सरल भाषामा भन्नुपर्दा यो चेम्बरजस्तो कोठा यसरी तयार गरिएको छ कि यसमा कुनै ध्वनि वा विद्युत चुम्बकीय तरंग पस्न सक्दैन। न्युयोर्क पोस्टका अनुसार हालसम्म कुनै पनि व्यक्ति यस कोठामा एक घण्टाभन्दा बढी बस्न सकेको छैन ।

तपाई यो थाहा पाउँदा छक्क पर्नुहुनेछ कि यस कोठामा बसेका मानिसहरूले आफ्नै मुटुको धड्कन सुन्न थाले, जबकि केही मानिसहरूले रगत बगेको आवाज र हड्डीहरू चर्केको आवाज स्पष्ट रूपमा सुन्न पाए।

वास्तवमा यो कोठामा प्रवेश गर्ने बित्तिकै बाहिरबाट आएको कोलाहल सुन्न सकिँदैन। यस कारणले गर्दा मानिसहरूले आफ्नो शरीरमा उत्पन्न हुने धेरै आवाजहरू सुन्न सक्छन्। यदि कसैले यो कोठामा घाँटी घुमाए पनि उसले पनि यो आवाज महसुस गर्न सक्छ। यहाँ व्यक्तिले आफ्नो सासको आवाज पनि सुन्न सक्छ।

यो कोठा कंक्रीट र स्टिलको ६ तहले बनेको छ। यो कोठा नजिकैको भवनको वातावरणबाट पूर्णतया फरक छ। यो कोठामा स्प्रिंग्स पनि छन्।