काठमाडौं । डरलाग्दो आतंकवादी संगठन अल कायदाले नयाँ प्रमुख पाएको छ । आतंकवादी संगठनबारे नयाँ संयुक्त राष्ट्र प्रतिवेदन अनुसार इजिप्टका पूर्व कर्णेल सैफ अल-आदेललाई निर्विरोध आतंकवादी समूहको प्रमुख नियुक्त गरिएको छ। अमेरिकाले आदेलमाथि १ करोड डलर पुरस्कार घोषणा गरेको छ । यस बारे अल कायदा द्वारा कुनै जानकारी साझा गरिएको छैन।

यद्यपि, एक अमेरिकी गुप्तचर अधिकारीले जनवरीमा भनेको छ कि जवाहिरीको उत्तराधिकारीको नाम अझै स्पष्ट छैन। संयुक्त राष्ट्रको प्रतिवेदनमा भनिएको छ, “नोभेम्बर र डिसेम्बरमा छलफलको क्रममा धेरै सदस्यहरूले भने कि सेफ अल-आदेल पहिले नै संगठनमा काम गरिरहेका छन् र समूहको निर्विरोध नेता हुन्।

गत वर्ष अफगानिस्तानको काबुलमा अमेरिकाले अलकायदा प्रमुख अल जवाहिरीलाई ड्रोन आक्रमणमा मारेको थियो । उनी ९/११ आक्रमणको षड्यन्त्रमा संलग्न थिए र २०११ मा ओसामा बिन लादेनको मृत्यु भएदेखि उनी अल कायदाको कमान्ड गर्दै थिए। उनको मृत्युपछि अलकायदा प्रमुखका लागि सैफ अल-आदेलको नाम अगाडि थियो। उनी आतंकवादी संगठनका प्रमुख नेताहरूमध्ये एक हुन्। उनीमाथि सन् १९९८ मा केन्यास्थित अमेरिकी दूतावासमा हमलाको योजना बनाएको आरोप छ।

आदेललाई एफबीआईले वान्टेड आतंकवादीको सूचीमा राखेको छ। उनी तान्जानिया र केन्यास्थित अमेरिकी दूतावासमा भएको आक्रमणको मुख्य योजनाकार मानिन्छन् । ओसामा बिन लादेन, अल जवाहिरी र मुल्ला उमर पछि सैफ अल अदेल अल कायदाका सबैभन्दा वरिष्ठ व्यक्ति हुन्, जो अझै जीवित छन्। एफबीआईले आदेलमाथि १० मिलियन डलरको इनाम राखेको छ । एडेलमाथि सन् १९९३ मा सोमालियामा ‘ब्ल्याक हक डाउन’ अपरेशन गरेको आरोप छ। जसमा १९ अमेरिकी सैनिक मारिएका थिए ।

अमेरिकी राष्ट्रपति जो बाइडेनले जुलाई ३१ मा अल कायदा प्रमुख अल जवाहिरी काबुलमा ड्रोन आक्रमणमा मारिएको घोषणा गरेका थिए । उनले अल जवाहिरी अफगानिस्तानको काबुलमा लुकेको बताए । अमेरिकी एजेन्सी सीआईएले हवाई आक्रमण गरेर उनको हत्या गरेको थियो । जवाहिरी ९-११ को षड्यन्त्रमा संलग्न थिए। यस आक्रमणमा २९७७ जनाको मृत्यु भएको थियो । अल जवाहिरीमाथि २ करोड ५० लाख डलर अर्थात १ अर्ब ९७ करोड रुपैयाँ पुरस्कार थियो । काबुलस्थित उनको निवासमा ड्रोनबाट हेलफायर मिसाइलहरू प्रहार गरिएको थियो। काबुलमा जवाहिरीको घरको बालकनीलाई मिसाइलले निशाना बनाएको थियो । आक्रमणको समयमा जवाहिरी घरको बालकनीमा उपस्थित थिए ।