काठमाडौं । बेलायतमा आधारित एक स्वतन्त्र फारसी भाषाको समाचार च्यानल इरान इन्टरनेशनलले लन्डनमा रहेका आफ्ना पत्रकारहरूले पाएको धम्कीका कारण बेलायतमा आफ्नो नियमित काम स्थगित गरेको घोषणा गरेको छ।

च्यानलले ‘इरानबाट राज्य समर्थित धम्कीमा उल्लेख्य वृद्धि भएको कारण’ यो निर्णय लिइएको बताएको छ। च्यानलका अनुसार “धम्की यति हदसम्म बढेको थियो कि अब च्यानलका कर्मचारीहरूलाई बचाउन सम्भव छैन भन्ने महसुस भयो।”

यद्यपी च्यानलले अमेरिकाको वासिङ्टन डिसीमा रहेको आफ्नो कार्यालयबाट सञ्चालन जारी रहने बताएको छ । नोभेम्बरमा यस च्यानलका दुई बेलायती-इरानी पत्रकारलाई प्रहरीले आफ्नो ज्यान खतरामा पर्न सक्ने चेतावनी दिएको थियो।

त्यसपछि पश्चिम लन्डनको चिसविकमा रहेको च्यानलको स्टुडियो नजिक प्रहरी गार्ड तैनाथ गरिएको थियो। साथै, उसको भवन बाहिर कंक्रीट अवरोध खडा गरिएको थियो।

यसै क्रममा लण्डनको मेट्रोपोलिटन प्रहरीका अनुसार पछिल्लो एक वर्षमा अपहरण र हत्याका करिब १५ वटा षड्यन्त्रलाई असफल पारिएको छ । बेलायतमा बस्ने इरान सरकारका कथित शत्रुहरू खतरामा पर्न सक्ने प्रहरीले जनाएको छ ।

सञ्जालका महाप्रबन्धक महमूद इनायतले भने: “म यो स्तरमा पुगेको विश्वास गर्न सक्दिन। बेलायतको भूमिमा विदेशी सरकारले बेलायती जनतालाई यति ठूलो खतरा खडा गरेको छ कि हामीले आफ्नो काम रोक्नुपरेको छ।”

उनले भने, “मलाई यो स्पष्ट पार्न दिनुहोस् कि यो हाम्रा टिभी स्टेशनहरूका लागि मात्र होइन, बेलायती जनताको विशाल बहुमतका लागि पनि खतरा हो।”