काठमाडौं । के किम जोङ उन अमेरिका र दक्षिण कोरिया विरुद्ध युद्धको तयारीमा छन् ? उत्तर कोरियाले आफ्नो देशका ८ लाख नागरिकले अमेरिकाविरुद्ध युद्ध लड्न सेनामा भर्ती हुने निर्णय गरेको दाबी गरेको छ ।

रोयटर्सले स्थानीय पत्रिका रोडोङ सिनमुनलाई उद्धृत गर्दै करिब ८ लाख मजदुर र विद्यार्थीले १ दिनभित्र सेनामा भर्ती हुने निर्णय गरेको बताएको छ । दक्षिण कोरिया र अमेरिकाको सेनाले संयुक्त अभ्यास गरिरहेको बेला यो जानकारी सार्वजनिक भएको हो ।

उत्तर कोरियाको बढ्दो आणविक र मिसाइल खतरालाई मध्यनजर गर्दै दुवै देशले यो वार्षिक सैन्य अभ्यास गरिरहेका छन् । यस अभ्यासको विरोधमा उत्तर कोरियाले धेरै ब्यालेस्टिक मिसाइल प्रक्षेपण गरेको छ।

उसले हालै १६ मार्चमा ह्वासोङ-१७ इन्टरकन्टिनेन्टल ब्यालिस्टिक मिसाइल (आईसीबीएम) प्रक्षेपण गरेको थियो। क्षेप्यास्त्र कोरियाली प्रायद्वीप र जापान बीचको समुद्रमा खसेको थियो। दक्षिण कोरियाका राष्ट्रपति शिखर सम्मेलनमा भाग लिन टोकियो प्रस्थान गर्ने क्रममा उक्त प्रक्षेपण भएको हो ।

उत्तर कोरियाली नेता किम जोङ उनकी बहिनी किम यो जोङ गत हप्ता संयुक्त राष्ट्र सुरक्षा परिषदमा आक्रोशित भइन् । उनले अमेरिकाले प्योङयाङविरुद्ध शत्रुतापूर्ण नीति लिएको आरोप लगाइन्। उनले भनिन्, “म चेतावनी दिन्छु कि हामी शत्रुको हरेक चालमा नजर राख्नेछौं र उसको हरेक शत्रु कदमको विरुद्ध उपयुक्त बलियो र भारी बदला लिनेछौं।”

उत्तर कोरियाको आधिकारिक समाचार एजेन्सी केसीएनएका अनुसार उत्तर कोरियाले अमेरिका र दक्षिण कोरियाबीच जारी युद्ध अभ्यासलाई उत्तेजक गतिविधि भएको बताएको छ । दुवै देशले ठूलो मात्रामा आक्रामक चाल चलाएर उसलाई उक्साइरहेका छन् ।

केसीएनएले भन्यो, ‘अमेरिका र दक्षिण कोरियाको उन्मादपूर्ण, उत्तेजक र आक्रामक चालबाजीबाट कोरियाली प्रायद्वीपमा अत्यधिक अस्थायी सुरक्षा वातावरण सिर्जना भइरहेको छ। जसका कारण अवस्था बिग्रिएको छ ।’