काठमाडौं । भारतीय सेनाका अधिकारीहरूका अनुसार पञ्जाबको भटिंडामा रहेको एक सैन्य स्टेशनमा गोली हानाहानमा घाइते भएका चार सैनिकको बुधबार बिहान मृत्यु भएको छ।

पञ्जाब पुलिसका अनुसार यस मामिलामा राइफल र बञ्चरोसहित देखिएका दुई मुखौटाधारी व्यक्तिको खोजी भइरहेको छ। यद्यपी सेनाका अधिकारीले घटनाको कारणबारे अहिलेसम्म जानकारी नदिएको र घटनाका सबै पक्षका बारेमा अनुसन्धान भइरहेको बताए ।

पञ्जाब प्रहरीले बीबीसीलाई यो घटना ‘आतंकवादी हमला’ नभएको बताएको छ । समाचार एजेन्सी पीटीआईले पुलिस अधिकारीहरूलाई उद्धृत गर्दै घटना कसरी भयो भन्ने बारे कुनै स्पष्ट तस्वीर नआएको बताएको छ।

पीटीआईले सेनाको स्रोतलाई उद्धृत गर्दै कोर्ट अफ इन्क्वायरी (कर्नल) ले यस विषयमा अनुसन्धान गर्ने बताएको छ। दुई दिनअघि हराएको उक्त राइफल घटनामा प्रयोग भएको प्रहरीको आशंका छ । हराएको राइफल फेला परेको सेनाले बुधबार जानकारी दिएको छ ।

एफआईआरमा के छ ?

एक जवानले कुर्ता पाइजामा लगाएका दुई जना अपरिचित मास्क लगाएका व्यक्तिलाई गोली चलेपछि ब्यारेकबाट बाहिर निस्केको देखे। तीमध्ये एकसँग राइफल र अर्कोसँग बन्चरो थियो।

संदिग्ध आक्रमणकारीहरू औसत उचाइका थिए। जवानलाई देखेपछि उनीहरू ब्यारेक नजिकको जंगल क्षेत्रमा गए । दुईजना सैनिक अधिकारी ब्यारेकभित्र पसेपछि सागर बन्ने (२५ वर्ष) र योगेशकुमार जे (२४ वर्ष) रगतले लतपतिएको देखे ।

अर्को कोठामा सन्तोष एम नागराल (२५ वर्ष) र कमलेश (२४ वर्ष) को शव फेला परेको थियो । उनीहरूको शरीरमा गोलीका निशानहरू थिए। मारिएका जवानहरूमध्ये दुई कर्नाटक र दुई तमिलनाडुका हुन्।

सेनाका मेजर आशुतोष शुक्लाको उजुरीका आधारमा भटिंडा क्यान्ट प्रहरी चौकीमा एफआइआर दर्ता गरिएको प्रहरीले जनाएको छ । यसमा दुई अज्ञात व्यक्तिहरू विरुद्ध आईपीसी धारा ३०२ (हत्या) र हतियार अधिनियमको धाराहरू लगाइएको छ।

पञ्जाब पुलिसले सेना अधिकारीहरूसँग सम्पर्कमा रहेको बताएको छ। योसँगै सेनाले पनि संयुक्त अनुसन्धानको जानकारी दिएको छ ।

के भने अनुसन्धान अधिकृतले ?

भटिण्डाका एसपी (डिटेक्टिभ) अजय गान्धीले प्रहरी अनुसन्धानको नेतृत्व गरिरहेका छन्।

एसपी अजय गान्धीले पत्रकारहरूलाई भने, “घटनास्थलबाट इन्सास राइफलका १९ खाली क्यासिङहरू फेला परेका छन्। सीसीटीभी फुटेज जाँच गरिँदैछ। सम्पूर्ण क्षेत्र खाली गरी सेनाले खोजी अभियान चलाएको छ।”

सेनाले के भन्यो ?

समाचार एजेन्सी पीटीआईका अनुसार सेनाको दक्षिण पश्चिमी कमाण्डले एक विज्ञप्तिमा भनेको छ, “यो दुर्भाग्यपूर्ण घटनामा सेनाको आर्टिलरी युनिटका चार सैनिकको गोली लागेर मृत्यु भएको छ। यसबारेमा थप जानकारी आउन सकेको छैन।”

सेनाद्वारा जारी विज्ञप्तिमा यो घटना बिहान साढे ४ बजे भएको बताइएको छ । सेनाले तुरुन्त कारबाही गर्न टोली खटाएको र सम्पूर्ण क्षेत्रलाई घेराबन्दी गरेको विज्ञप्तिमा उल्लेख छ ।

सेनाले जारी गरेको विज्ञप्तिमा भनिएको छ, “घटनाका सबै पक्षमा अनुसन्धान भइरहेको छ। दुई दिनअघि हराएको इन्सास राइफल र २८ गोलीको सम्भावित संलग्नताबारे पनि अनुसन्धान भइरहेको छ।”

पञ्जाब प्रहरीले भटिंडा मिलिटरी स्टेसनमा भएको गोलीबारी ‘आतंकवादी घटना’ नभएको बताएको छ ।

भटिंडाका एएसपी गुलनीत सिंह खुरानाले बीबीसी संवाददाता अरविन्द छाबरालाई भने, “यो आतंकवादी हमला होइन। घटनाको जानकारी पाएर प्रहरी घटनास्थलमा पुग्यो तर गोली कसले चलायो भन्ने अहिलेसम्म थाहा हुन सकेको छैन।”

एसएसपी खुरानाले पूरै क्षेत्र सिल गरिएको र खोजी अभियान जारी रहेको बताए ।

समाचार एजेन्सी पीटीआईले पंजाब पुलिसका एडीजी एसपीएस परमारलाई उद्धृत गर्दै भने, “यो आतंकवादी हमला होइन। यो आक्रमण बाहिरबाट भएको होइन। हामी सेनाका अधिकारीहरूसँग सम्पर्कमा छौं।”

दुई दिनअघि भटिण्डा मिलिटरी स्टेसनबाट २८ थान म्यागजिनसहितको राइफल हराएको थियो । सेना र प्रहरीले गोलीबारी घटनामा यो राइफल प्रयोग भएको थियो वा थिएन भनेर अनुसन्धान गरिरहेको छ।

बीबीसी पञ्जाबीका अनुसार प्रहरी अधिकारीहरूले यसअघि घटनामा सेनाका कर्मचारी नै संलग्न हुन सक्नेबारे अनुसन्धान भइरहेको बताएका थिए।