काठमाडौं । सुडानको सेना र अर्धसैनिक बल ‘र्यापिड सपोर्ट फोर्स’ अर्थात आरएसएफबीच २४ घण्टा युद्धविरामको घोषणा गरिएको छ । यो युद्धविराम नेपाली समय अनुसार गएराति ९:४५ बजे सुरु भएको छ।

आरएसएफले ट्वीटमा भनेको छ, “हामी पूर्ण युद्धविरामका लागि पूर्ण प्रतिबद्ध छौं र अर्को पक्षले घोषणा गरे अनुसार युद्धविरामको पालना गर्ने अपेक्षा गर्दछौं।”

तर, सेनाले यो युद्धविराममा सहमति जनायो वा मानेको छैन भन्ने अझै स्पष्ट भइसकेको छैन । मंगलबार दुवै पक्षले २४ घण्टा युद्धविरामको पालना गर्ने बताएका थिए ।

युद्धविराम स्थानीय समय अनुसार इफ्तारको लगत्तै सुरु हुने भनिएको थियो तर विशेष गरी राजधानी खार्तुमको केन्द्रमा रहेको सैन्य मुख्यालय वरपर भारी लडाई जारी छ।

आरएसएफले सहरबाहिर रहेको सैन्य हवाई अड्डामा फसेका इजिप्टका सैनिकहरूलाई खार्तुम सहरमा सारिएको र सुरक्षित रहेको जनाएको छ। समय आएपछि उनीहरूलाई इजिप्टको जिम्मा लगाइनेछ।

खार्तुममा यो लडाईको पाँचौं दिन हो र हालसम्म २०० जनाको मृत्यु भइसकेको छ । मानिसहरु सहर छोडेर पलायन भइरहेका छन् ।

सहरका ५९ अस्पतालमध्ये पाँचवटा मात्रै खुलेको एक चिकित्सकले बीबीसीलाई बताए।

यसैबीच रुसको निजी सेना वाग्नर समूहले सुडान संकटमा आफ्नो संलग्नता अस्वीकार गरेको छ ।

सहरका अधिकांश क्षेत्रमा मानिसहरु घरमै थुनिएका छन् । तीमध्ये धेरै विदेशी नागरिक पनि छन् ।

भारतीय दूतावासले सुडानमा १८१ भारतीय नागरिक अलपत्र परेकाले उनीहरुको सुरक्षित उद्दारका लागि सुडानका अन्य छिमेकी मुलुकसँग वार्ता भइरहेको जनाएको छ ।

जर्मनीले आफ्ना करिब १५० नागरिकलाई बाहिर निकाल्न वायुसेनालाई आदेश दिएको थियो तर द्वन्द्व चर्किँदै गएपछि यो योजना स्थगित गरिएको छ ।

लुफ्टवाफे वायुसेनाले यसका लागि तीनवटा विमान पठाएको थियो, तर यो उद्धार अभियान बीचमै रद्द गर्नुपर्‍यो।

तान्जानियाको विदेश मन्त्रालयले १७१ विद्यार्थीसहित आफ्ना २०० नागरिकलाई बाहिर निकाल्ने योजनामा ​​काम गरिरहेको जनाएको छ।

एक रुसी महिलाले राजधानीको एउटा चर्चमा बिजुली र पानी नभएको ठाउँमा शरण लिएकी छिन् । उनले बीबीसीलाई बताइन् कि शनिबार इस्टर सेवा भएदेखि उनी आफ्नी सात वर्षीया छोरीसँग यहाँ फसेकी छिन्।

सहायता समूहहरूले सुडानमा राहत वितरण गर्न असम्भव भएको बताएका छन्। नर्वेजियन शरणार्थी परिषद्का प्रमुख जान इगल्यान्डले १५.८ मिलियन जनसङ्ख्यालाई यतिबेला मानवीय सहायताको नितान्त आवश्यकता रहेको तर चारैतिर लडाइँ भइरहेको र विमानस्थलहरू पनि बन्द हुँदा सडकमा निस्कनु उपयुक्त नभएको बताए ।

उनले आफ्नो अधिकांश पसल लुटिएको र उनका चार सहयोगी मारिएको बताए । खार्तूममा, रेड क्रसले लगातार कलहरू प्राप्त गरिरहेको छ र मानिसहरू खाली गर्न बिन्ती गरिरहेका छन्। तर रेडक्रसले पनि हात उठाएको छ ।

सुडानमा रहेको रेडक्रसका प्रमुख फरीद अब्दुलकादिरले बीबीसीलाई भने कि अहिले बाहिर निकाल्नु ठूलो चुनौती हो र उनीहरू जहाँ छन् त्यहाँ बस्नु सुरक्षित छ।