काठमाडौं । छत्तीसगढको कांकेर जिल्लाको पखञ्जुरमा मोबाइल फोन निकाल्न बाँधको पानी खाली गरेकोमा राज्य सरकारले सिँचाइ विभागका उप-विभागीय अधिकारीलाई निलम्बन गरेको छ।

जलस्रोत विभागका विशेष सचिवले बुधबार यस सम्बन्धमा आदेश जारी गरेका हुन् । मोवाइल लिन बाँध खाली गर्ने फुड इन्स्पेक्टरलाई यसअघि नै निलम्बन गरिसकिएको छ । यसबाहेक उनलाई ५३ हजार जरिवाना पनि तिर्न आदेश दिइएको छ ।

उल्लेखनीय कुरा के छ भने, यही महिनाको २१ तारिखका दिन काङ्केर जिल्लाको पखनजुरमा सहकर्मीहरूसँग पिकनिक मनाउन गएका खाद्य निरीक्षक राजेश विश्वासको महँगो मोबाइल फोन बाँधमा खसेको थियो ।

त्यसपछि फूड इन्स्पेक्टरले चार दिनसम्म मोटर पम्प प्रयोग गरी बाँधबाट चार लाख लिटरभन्दा बढी पानी निकाले । बाँधमा पानी कम भएपछि गोताखोरले खाद्य निरीक्षकको मोबाइल फोन फेला पारे । तर, फोन अन गर्न सकिएन ।

गर्मीका कारण आसपासका क्षेत्रमा खानेपानीको चर्को संकट भइरहेको बेला बाँधबाट पानी फ्याँक्ने काम गरिएको हो ।

सामाजिक सञ्जालमा यो घटनाको चर्चा भएपछि प्रदेश सरकारले यस विषयमा छानबिन गर्न निर्देशन दिएको थियो । त्यसपछि प्रारम्भिक प्रतिवेदनका आधारमा खाद्य निरीक्षक राजेश विश्वासलाई निलम्बन गरिएको थियो ।

यसैगरी सिँचाइ विभागले विना अनुमति ४१०४ घनमिटर पानी प्रति घनमिटर १० दशमलव ५० रुपैयाँका दरले ४३ हजार ९२ रुपैयाँ र खाद्य निरीक्षकलाई पानी बर्बाद गरेमा १० हजार रुपैयाँ जरिवाना समेत गरेको छ ।