काठमाडौं । शनिबार दिल्लीमा भीषण वर्षापछि मुख्यमन्त्री अरविन्द केजरीवालले आइतबार सबै सरकारी कर्मचारीको बिदा रद्द गर्ने आदेश दिएका छन् ।

उनले सबै मन्त्रीहरू र दिल्लीका मेयर शैली ओबेरोयलाई “समस्या क्षेत्रहरू” भ्रमण गर्न पनि आग्रह गरेका छन्। यसबारे अरविन्द केजरीवालले ट्विट गरेका छन् ।

जसका अनुसार “दिल्लीमा हिजो १२६ मिलिमिटर वर्षा भएको थियो। मनसुन सिजनको कुल वर्षाको १५ प्रतिशत मात्र १२ घण्टामा परेको थियो। जलमग्नका कारण मानिसहरु निकै मर्माहत भएका थिए। आज दिल्लीका सबै मन्त्री र मेयरले समस्याग्रस्त क्षेत्रको निरीक्षण गर्नेछन्। अधिकारीहरूलाई आइतबारको बिदा रद्द गरी मैदानमा उत्रन निर्देशन दिइएको छ।”

मौसम विभागलाई उद्धृत गर्दै समाचार एजेन्सी पीटीआईले आइतबार बिहान ८:३० बजेसम्मको तथ्यांकअनुसार पछिल्लो २४ घण्टामा दिल्लीमा १५३ मिलिमिटर वर्षा भएको जनाएको छ। यो सन् १९८२ को जुलाईयताकै उच्च हो ।

वेस्टर्न डिस्टर्बन्स र मनसुन हावाको टक्करका कारण दिल्ली समेत उत्तर पश्चिम भारतमा भारी वर्षा भइरहेको छ। शनिबार सिजनको पहिलो ‘भारी’ वर्षा भयो ।