काठमाडौं । आइतवार विश्वकपको फाइनल खेलसँगै भारतका प्रशिक्षक राहुल द्रविडको कार्यकाल सकिएको छ ।

सन् २०२१ को टी–२० विश्वकपपछि रवि शास्त्रीको स्थानमा राहुल द्रविडलाई प्रशिक्षक बनाइएको थियो । भारतीय टोलीको प्रशिक्षकका रूपमा राहुल द्रविडको कार्यकाल २ वर्षको थियो जुन विश्वकपपछि समाप्त हुँदैछ।

आइतबारको पत्रकार सम्मेलनमा आफ्नो भावी योजनाका बारेमा उनले भने– ‘अब के गर्छु भनेर धेरै सोच्ने समय पाएको छैन किनभने मेरो सम्पूर्ण ध्यान यो विश्वकपमा केन्द्रित थियो । खेल सकिएपछि म यहाँ आएको छु । इमानदारीपूर्वक भन्नुपर्दा, म मेरो कामको मूल्याङ्कन गर्ने व्यक्ति होइन। म यो अद्भुत टोली र अद्भुत सहयोगी स्टाफसँग काम गर्न पाउँदा गर्व गर्छु। मैले पछिल्ला दुई वर्षमा सबै फर्म्याटमा काम गरेका सबै खेलाडी मेरो लागि उत्कृष्ट अनुभव हुन्।

राहुल द्रविडले यस समयमा ड्रेसिङ रुमको वातावरण निकै फरक रहेको, खेलाडीहरु भावुक रहेको बताए । उनले भने ‘एक प्रशिक्षकको हैसियतले मलाई यो सबै हेर्न निकै गाह्रो छ।’

रोहित शर्माको कप्तानीको बारेमा उनले भने ‘मलाई थाहा छ कि रोहितले उत्कृष्ट ड्रेसिङ वातावरण कायम राख्छन्, उनी धेरै मेहनत गर्छन् र विगतका वर्षहरूमा उनले आफ्नो व्यक्तिगत समय पनि टोलीलाई दिएका छन्। उनी एक महान कप्तान हुन् र मसँग उनको बारेमा राम्रो कुरा मात्र छ।’