काठमाडौं । इजरायल र हमास बीचको युद्धको बीचमा इजरायली प्रधानमन्त्री बेन्जामिन नेतान्याहुले गाजा नजिकै नयाँ गाउँको शिलान्यास गरेका छन् ।

प्रधानमन्त्री नेतन्याहुले यो गाउँ ‘ओफिर’ समुदायका लागि स्थापना गर्दैछन्। यो गाउँ शार हानेगेभ क्षेत्रीय परिषद्का प्रमुख ओफिर लिबस्टिनको सम्मानमा स्थापना गरिएको हो। ओफिर अक्टोबर ७ मा हमासको आक्रमणमा मारिएका थिए।

यस क्रममा निर्माण तथा आवास मन्त्री यित्जाक गोल्डेनकनुफ र गाजा पट्टी वरपरका क्षेत्रका स्थानीय परिषद्का प्रमुखहरू पनि उपस्थित थिए। ओफिर लिबस्टिनको साहसको प्रशंसा गर्दै उनले आफ्ना छोरा नित्जानसँग मिलेर अक्टोबर ७ मा किबुट्जमा हमास लडाकुहरूसँग साहसपूर्वक सामना गरेको बताए।

नेतान्याहुले भने ‘तपाईहरु सबैले धेरै कठिन समय देख्नुभएको छ। तपाइँका साथीहरू मारिए। नेताहरु मारिए । यो युद्धमा महिला र पुरुष लडे । अक्टोबर ७ मा जे भयो त्यो अकल्पनीय थियो । अब इजरायलका मानिसहरूले जिम्मेवारी लिएका छन्। हामी हत्यारालाई सखाप पार्छौं । हामीले राज्य, सेना, समुदाय र सहर बनाएका छौं। हामीले खुला हृदयले आप्रवासीहरूलाई स्वीकार गरेका छौं तर अझै पनि यो युद्ध १०० वर्षदेखि निरन्तर जारी छ।’

उनले केही महिनाअघि नयाँ समुदाय बनाउने निर्णय गरी हनुन नाम राखेको तर आज नाम परिवर्तन गरेर ओफिर राखेको बताए । उनले भने ‘यो नाम हाम्रो बहादुर ओफिर लिब्स्टेनको नामबाट दिइएको छ। यहाँ बालबालिकाले उनको वीरता र त्यागको बारेमा पढेर हुर्किनेछन्।’

इजरायल र हमासबीचको युद्धमा हालसम्म १६ हजारभन्दा बढीको मृत्यु भइसकेको छ । ठूलो संख्यामा मानिसहरु घाइते समेत भएका छन् । हमासले पनि ठूलो संख्यामा मानिसहरूलाई बन्धक बनाएको छ, जसलाई उसले युद्धविराम अन्तर्गत बिस्तारै रिहा गर्दैछ।

अक्टोबर ७ मा हमासले गाजा पट्टीबाट ५ हजारभन्दा बढी रकेट प्रहार गरेर इजरायलमा आक्रमण गरेको थियो । त्यसको लगत्तै इजरायलका प्रधानमन्त्री बेन्जामिन नेतान्याहुले हमासविरुद्ध युद्धको घोषणा गरेका थिए । यस युद्धमा गाजा पट्टी पूर्ण रूपमा ध्वस्त भएको छ।