काठमाडौं । जर्मनीमा भारी हिमपात भएको छ । अस्ट्रिया, स्विजरल्याण्ड र चेक गणतन्त्रमा पनि यस्तै अवस्था छ। त्यहाँ २०-२० इन्च हिउँ जमेको छ। पछिल्लो २४ घण्टामा मध्य युरोपका यी देश पूर्ण रूपमा हिउँले ढाकेका छन् ।

सबैभन्दा खराब अवस्था दक्षिणी जर्मनीमा छ। हिमपातका कारण युरोपका यी देशहरूमा यातायात अवरुद्ध भएको छ । एयरलाइन्स रोकिएका छन्। रेल र बसहरू बन्द छन्।

शनिबार बिहान म्युनिख विमानस्थलमा दिउँसो उडान सुचारु हुने घोषणा गरिएको थियो । तर केही समयपछि मौसम खराब हुँदै गयो । यसपछि अब आइतबार बिहान ६ बजे उडान सुरु हुने बताइएको थियो । तर त्यो हुन सकेन । जुरिच एयरपोर्टको अवस्था पनि उस्तै थियो। त्यहाँ पनि मौसमका कारण धेरै विमान ढिला उडेका छन् । कतिपय रद्द पनि भएका छन् ।

म्युनिखको केन्द्रीय स्टेशनबाट रेलहरू छुट्न सकेनन्। सुपरफास्ट रेलका इन्जिनहरूमा बरफको बाक्लो तह थियो। यात्रुहरूलाई आफ्नो मार्ग परिवर्तन गर्न वा आफ्नो यात्रा रद्द गर्न सल्लाह दिइएको छ। म्युनिख सेन्ट्रल स्टेशनका केही यात्रुहरूले शुक्रबार राती स्टेशनमै बिताए। म्युनिखमा कुनै बस वा ट्राम सेवा चलिरहेको छैन। सडकमा २०–२० इन्च हिउँ जमेको छ ।

जर्मनीको बाभेरिया प्रान्तमा आएको हिउँ आँधीका कारण हजारौं रुखहरु ढलेका छन् । उनीहरुमाथि हिउँ जमेको छ । जसका कारण बिजुलीका पोलहरु ढलेका छन् । करोडौं जनता बिजुलीविना बाँचिरहेका छन् । बायर्न म्युनिख र युनियन बर्लिनबीचको फुटबल खेल रद्द भएको छ ।

भारी हिमपातका कारण ३५० जना घाइते भएका छन् । धेरै दुर्घटनाको खबर पनि आएको छ । हिउँका कारण सवारी साधन चिप्लिएर दुर्घटना भएको हो । यद्यपी यी दुर्घटनामा कसैको ज्यान गएको खबर भने आएको छैन । तर मानिसहरु पक्कै घाइते भएका छन्।

अस्ट्रिया र स्वीट्जरल्याण्डमा ताजा हिमपातका कारण हिमपहिरोको चेतावनी जारी गरिएको छ । पश्चिमी अस्ट्रियाको टिरोल र भोरार्लबर्गमा हिमपहिरोको चेतावनी दोस्रो उच्च स्तरमा बढाइएको छ। यस क्षेत्रमा एक रातमा ५० सेन्टिमिटरसम्म हिमपात भएको छ ।

चेक गणतन्त्रका प्रमुख राजमार्गहरू बन्द गरिएका छन्। रेल र सार्वजनिक यातायात सेवाहरू बन्द छन् वा ढिलो चलिरहेका छन्। १५ हजारभन्दा बढी घरमा बिजुली छैन । प्रागको मुख्य राजमार्ग डी-१ धेरै घण्टा अवरुद्ध भएको थियो। यो जाम करिब २० किलोमिटर लामो थियो। तीमध्ये अधिकांश कार्गो ट्रकहरू थिए।

प्राग र जर्मनी जोड्ने राजमार्ग डी-५ मा पनि जाम थियो। उच्च गति र क्षेत्रीय रेलहरू रोकिएका छन्। सीमापार रेलहरू पनि रोकिएका छन्। ट्र्याकमा रहेको हिउँ नपग्लिएसम्म तिनीहरू सञ्चालन हुने छैनन्। अस्ट्रिया र जर्मनीले हाल यस्तै निर्णय लिएका छन्।

आगामी एक–दुई दिनसम्म यी सबै देशमा ट्राफिक पूर्ण रूपमा सञ्चालन नहुने अपेक्षा गरिएको छ । किनभने त्यहाँको मौसममा हावाहुरीको प्रभाव कायमै छ । बेलाबेलामा हिउँ परिरहेको छ ।