काठमाडौं । फ्रान्सले पनि इजरायल-गाजा युद्धमा तत्काल र स्थायी युद्धविरामको माग गरेको छ। फ्रान्सका विदेशमन्त्री क्याथरिन कोलोनाडेले गाजाको अवस्थालाई लिएर फ्रान्स ‘चिन्तित’ रहेको बताएकी छिन् ।

समाचार एजेन्सी एएफपीसँग कुरा गर्दै क्याथरिन कोलेनाले भनिन्, ‘गाजामा ठूलो संख्यामा सर्वसाधारण मारिएका छन्।’

पेरिसमा इजरायलका विदेशमन्त्री एली कोहोनसँग भेट गरेपछि क्याथरिनले सञ्चारमाध्यमसँग यस्तो बताएकी हुन् ।

उनले अक्टोबर ७ मा हमासको आक्रमणमा मारिएका इजरायली जनतालाई पनि बिर्सन नहुनेमा जोड दिइन् ।

जर्मनी र बेलायतले पनि गाजामा स्थायी युद्धविरामको माग गरेका छन् ।

बेलायती विदेशमन्त्री डेभिड क्यामरुन र जर्मन विदेशमन्त्री एनालेना बेरबुचले गाजामा तत्काल र स्थायी युद्धविरामको माग गरेका छन् ।

उनीहरूले भनेका छन्, ‘लडाइँको अन्त्य स्थायी साबित भयो भने लडाइँ बन्द गर्नुपर्छ ।’

दुवै विदेशमन्त्रीले संयुक्त रूपमा बेलायती पत्रिका सन्डे टाइम्समा लेख लेखेका छन् ।

उनीहरूले भने, ‘हाम्रो उद्देश्य आजको लडाइँ रोक्ने मात्र हुनु हुँदैन । यो दिनहरू, वर्षहरू र पुस्ताहरूका लागि दिगो शान्ति प्राप्त गरेर हासिल गर्नुपर्दछ। ”

मङ्गलबार गाजामा तत्काल मानवीय युद्धविराम लागू गर्न संयुक्त राष्ट्रसंघमा प्रस्ताव ल्याइयो। यस विषयमा भएको मतदानमा जर्मनी र बेलायत अनुपस्थित थिए ।

इजरायलका प्रधानमन्त्री बेन्जामिन नेतान्याहुले बन्धकहरुको रिहाईका लागि सैन्य दबाब कायम राख्न आवश्यक रहेको बताएका छन् ।

अन्तर्राष्ट्रिय दबाबका बाबजुद नेतान्याहुले पूर्ण विजय हासिल नभएसम्म युद्ध जारी रहने बताएका छन् ।

नेतान्याहुले बन्धकहरूलाई फिर्ता ल्याउन सेनाको दबाब कायम राख्ने रणनीति प्रभावकारी सावित भएको र हालसम्म करिब एक सय बन्धकलाई रिहा गरिएको बताएका छन् ।

यसैबीच गाजाको जबलिया शिविरमा भएको बम आक्रमणमा ३५ प्यालेस्टाइनीको मृत्यु भएको छ । प्यालेस्टिनी समाचार सेवा वाफाले यो जानकारी दिएको हो । इजरायली सेनाले शनिबार जबलिया शिविरमा हवाई बमबारी भएको पुष्टि गरेको थियो।

इजरायली सेनाले भवनको छतमा हमास लडाकुहरू देखेपछि बमहरू भवनमा खसालेको बताएको छ।