काठमाडौं । चीनका प्रसिद्ध अर्बपति बैंकरमध्येका एक बाओ फ्यानले आफ्नो लगानी कम्पनीको प्रमुख पदबाट राजीनामा दिएका छन् ।

उनको कम्पनी ‘चाइना रेनेसान्स होल्डिङ्स’ ले यो खबरको पुष्टि गर्दै ‘स्वास्थ्य र पारिवारिक कारण’ देखाउँदै सबै पदबाट राजीनामा दिएको बताएको छ । ‘चाइना रेनेसान्स होल्डिङ्स’ बाओ फ्यानले बनाएको कम्पनी हो र यसले लगानी बैंकिङको व्यवसाय गर्छ।

बाओ फ्यान गत वर्ष फेब्रुअरीमा अचानक ‘बेपत्ता’ भएका थिए । त्यसयता उनको कुनै खबर आएको थिएन । बाओ फ्यान अचानक बेपत्ता हुनु अघि, चिनियाँ सरकारले वित्तीय सेवा कम्पनीहरू विरुद्ध घूसखोरीको आरोपमा अनुसन्धान सुरु गरेको थियो।

चीन सरकारको यो कदमले देशका धेरै व्यापारी स्तब्ध भएका छन् । त्यतिबेला ‘चाइना रेनेसान्स होल्डिङ्स’ले एक विज्ञप्तिमा बाओ फ्यानले सरकारी अधिकारीलाई अनुसन्धानमा सहयोग गरिरहेको बताएको थियो। बाओ फ्यानले देशमा ठूला टेक कम्पनीहरूको उदयमा ठूलो भूमिका खेलेको मानिन्छ।